Bachchu Kadu | अकोला जिल्हा परिषदेचे निधी अपहार प्रकरण, पालकमंत्री बच्चू कडू यांना जामीन मंजूर

अकोला : जिल्ह्याचे पालकमंत्री बच्चू कडू (Guardian Minister Bachchu Kadu) यांच्यावर प्रथमश्रेणी न्यायालयाने कलम 156 (3) नुसार सिटी कोतवाली पोलीस ठाण्यात गुन्हा दाखल झाला होता. त्यांनी सत्र न्यायालयात जामीन मिळविण्यासाठी अर्ज दाखल केला होता. या अर्जावर न्यायालयाने आज निकाल देत पालकमंत्री कडू यांना जामीन मंजूर केला आहे. दोन्ही पक्षातर्फे युक्तिवाद करण्यात आला. अकोल्यातील जिल्हा परिषदेकडून जिल्हा नियोजन समितीकडे (Zilla Parishad Zilla Planning Committee) पाठविलेल्या रस्त्यांच्या प्रस्तावामध्ये परस्पर बदल करून पालकमंत्री बच्चू कडू यांनी 1 कोटी 95 लाखांचा निधीचा अपहार केल्याचा आरोप वंचित बहुजन आघाडीने (Vanchit Bahujan Aghadi) केला होता. या प्रकरणी ही सुनावणी झाली. यात बच्चू कडू यांना जामीन मिळाला. त्यामुळं बच्चू कडू यांना दिलासा मिळाला आहे.

समितीच्या 13 कामांना स्थगिती

जिल्हाधिकारी निमा अरोरा यांनी जिल्हा नियोजन समितीच्या 13 कामांना स्थगिती दिली. आता पालकमंत्री कडू यांच्यावर पोलिसांनी गुन्हे दाखल करण्याची मागणी वंचितने केली आहे. त्यानंतर वंचित बहुजन आघाडीचे प्रदेश उपाध्यक्ष प्रा. धैर्यवेधन पुंडकर यांनी न्यायालयात धाव घेतली. न्यायालयाने यामध्ये कमल 156 (3) नुसार पालकमंत्री बच्चू कडू यांच्याविरोधात गुन्हा दाखल करण्याचे आदेश दिले होते.

बी. के. गांधी यांनी पाहिले काम

सिटी कोतवाली पोलीस ठाण्यात पालकमंत्री कडू यांच्याविरोधात गुन्हा दाखल केला. त्यानंतर पालकमंत्री कडू यांनी जामीन मिळविण्यासाठी न्यायालयात अर्ज दाखल केला. सत्र न्यायालयाने यामध्ये दोन्ही पक्षाचा युक्तिवाद ऐकल्यानंतर पालकमंत्री कडू यांना 9 मेपर्यंत जामीन मंजूर केला होता. या जामिनावर सुनावणी झाली. न्यायालयाने यामध्ये पोलीस निरीक्षक चंद्रशेखर कडू यांना हजर राहण्याचे आदेश दिले होते. न्यायाधीश यांनी दोन्ही बाजूचा युक्तिवाद ऐकल्यानंतर पालकमंत्री कडू यांना जामीन मंजूर केला आहे. पालकमंत्री यांच्याकडून ऍड. बी. के. गांधी यांनी काम पाहिले.