‘देवेंद्र फडणवीसजी, तुम्ही किती घाणेरडे आणि खालच्या थराचे…’, अनिल देशमुख यांचं भाजपला प्रत्युत्तर

महाराष्ट्राचे विद्यमान गृहमंत्री देवेंद्र फडणवीस आणि माजी गृहमंत्री अनिल देशमुख यांच्यात चांगलंच वाकयुद्ध रंगलं आहे. बडतर्फ एपीआय सचिन वाझे याने नुकतेच अनिल देशमुख यांच्यावर गंभीर आरोप केले आहेत. त्यानंतर अनिल देशमुख यांनी उपमुख्यमंत्री देवेंद्र फडणवीस यांच्यावर गंभीर आरोप केले. देवेंद्र फडणवीस यांच्या सांगण्यावरुनच मुंबईचे माजी पोलीस आयुक्त परमबीर सिंह यांनी आपल्यावर गंभीर आरोप केले होते. तसेच देवेंद्र फडणवीस यांच्या सांगण्यावरुनच सचिन वाझे याने आपल्यावर आरोप केले असा गंभीर आरोप अनिल देशमुख यांनी केला. अनिल देशमुख यांच्या आरोपांना देवेंद्र फडणवीस यांनी जोरदार प्रत्युत्तर दिलं आहे. यानंतर अनिल देशमुख यांनी आज नागपूरमधील एका बॅनरचा फोटो ट्विट करत भाजपला प्रत्युत्तर दिलं आहे.

नागपूरच्या रामनगर परिसरात भारतीय जनता युवा मोर्चाकडून होर्डिंग लावण्यात आलं आहे. या होर्डिंगवर विकास वृत्ती असं लिहून त्याखाली देवेंद्र फडणवीस यांचा फोटो लावण्यात आला आहे. तर वसुली बुद्धी असं लिहून त्याखाली अनिल देशमुख यांचा फोटो लावण्यात आला आहे. अनिल देशमुख यांचा फोटो ब्लॅक बॅकग्राऊंडवर असून त्यासमोर तुरुंगात दाखविण्यात आलेला आहे. होर्डिंगचा हा फोटो अनिल देशमुख यांनी ‘एक्स’वर टाकला असून जनता जनार्दनानं हे लक्षात ठेवावं असं उल्लेख केला आहे.

अनिल देशमुख काय म्हणाले आहेत?

“धन्यवाद देवेंद्र फडणवीसजी! महाराष्ट्रात तुम्ही किती घाणेरडे आणि खालच्या थराचे राजकारण करत आहात, याचा नवीन अंक आज नागपूरच्या जनतेला पुन्हा एकदा तुमच्याकडून पाहायला मिळाला. लक्षात असू द्या… जनता जनार्दन आहे”, असं ट्विट अनिल देशमुख यांनी केलं आहे.

प्रवीण दरेकर यांचा अनिल देशमुखांवर निशाणा

दुसरीकडे भाजप नेते प्रवीण दरेकर यांनी अनिल देशमुख यांच्यावर टीका केली आहे. “महाराष्ट्रात तुम्ही कितीही खोटारडे आणि खालच्या स्तराचे राजकारण केले तरी ते अजिबात चालणार नाही. तुमच्यातील सावत्र भावाचे रूप महाराष्ट्र रोज पाहतो आहे. लक्षात ठेवा, माय-माऊली तुम्हाला कधीच माफ करणार नाही”, अशी टीका प्रवीण दरेकर यांनी अनिल देशमुख यांच्यावर केली.

महाराष्ट्रात तुम्ही कितीही खोटारडे आणि खालच्या स्तराचे राजकारण केले तरी ते अजिबात चालणार नाही. तुमच्यातील सावत्र भावाचे रूप महाराष्ट्र रोज पाहतो आहे. लक्षात ठेवा, माय-माऊली तुम्हाला कधीच माफ करणार नाही! https://t.co/L4CtpvbAma pic.twitter.com/zgzmsub8Hl

— Pravin Darekar – प्रविण दरेकर (@mipravindarekar) August 4, 2024