मुंबईतील सोसायटीत कुर्बानीवरून वाद, परवानगी केली रद्द

Bakri Eid : बकरी इदच्या पार्श्वभूमीवर मुंबई, उनगरातील अनेक सोसायट्यांत कुर्बानीवरून वाद निर्माण झाल्याचे समोर आले आहे. काही ठिकाणी सोसायटीतील इतर सदस्यांनी कुर्बानीसाठी आणलेले बकरे ठेवण्यास मनाई केली. तर काही सोसायट्यांनी कुर्बानीला दिलेली परवानगी मागे घेतली आहे. मुंबईतील गोरेगाव येथील सॅटेलाईट गार्डन्स फेज-2 या सोसायटीत बुधवारी वाद झाल्यानंतर कुर्बानीची परवानगी रद्द केली आहे. एकीकडे कुर्बानीची तयारी केली जात असताना परिसरात तणावाचे वातावरण निर्माण झाले होते. त्यानंतर पोलिसांनी हस्तक्षेप करत कुर्बानीची ही परवानगी रद्द केली आहे.

दिंडोशी परिसरातील सोसायटीत वाद

न्यूज एजन्सी एएनआयने दिलेल्या माहितीनुसार दिंडोशी पोलीस ठाण्याचे वरिष्ठ पोलीस निरीक्षक महेंद्र शिंदे यांनी या प्रकरणाविषयी सविस्तर माहिती दिली आहे. त्यांनी सांगितल्यानुसार सोसायटीच्या परिसरात आता कुर्बानी देण्यास मनाई असेल. तेथे ठेवण्यात आलेल्या बकऱ्यांनाही हटवण्याचा आदेश देण्यात आलेला आहे. दिंडोशी परिसरातील आझाद नगर डी-3 इमारतीतही बीएमसीने अगोदर कुर्बानीसाठी परवानगी दिली होती. आता ही परवानगी बीएमसीने मागे घेतली आहे. सोसायटीपासून एक किलोमीटरच्या परिसरात मटण शॉप आहे. त्यामुळे ही परवानगी रद्द करण्यात आली आहे, असे सांगण्यात आले आहे.

घाटकोपरच्या सोसायटीमध्ये वाद

मुंबईती सोसायट्यांमध्ये कुर्बानीसाठी दिली जाणारी परवानगी वादाचा मुद्दा होत आहे. बुधवारी घटकोपर पश्चिममधील सागर पार्क हाऊसिंग सोसायटीमध्ये असाच काहीसा प्रकार पाहायला मिळाला. या ठिकाणी सोसायटीच्या परिसरात कुर्बानीची तयारी केली जात होती. परंतु यावर काही लोकांनी आक्षेप घेतला. त्यामुळे तेथे काही काळासाठी तणावाची स्थिती निर्माण झाली होती. या घटनेची माहिती मिळताच भाजपाचे नेते किरीट सोमय्या यांनी त्या सोसायटीमध्ये जाऊन बीएमसी प्रशासनाला सवाल केले. आम्ही अगोदरच या सोसायटीमध्ये कुर्बानी देण्यास नकार दिला होता, असे बीएमसीने सांगितले आहे. दरम्यान, बकरी ईदची जय्यत तयारी केली जात आहे. तुरळक ठिकाण वगळता बाकीच्या ठिकाणी मोठ्या उत्साहात हा सण साजरा करण्यासाठी तयारी होत आहे. प्रशासनानेही कोणताही अनुचित प्रकार घडू नये म्हणून खबरदारी घेतलेली आहे.