कर्मचाऱ्यांच्या मनात कोरोनाची भीती, पाठीवर पंप घेवून नगराध्यक्ष स्वत:च निर्जंतूक फवारणीच्या कामाला

नागपूर : सध्या जगभरात कोरोना विषाणूच्या संसर्गाने थैमान घातलं आहे. त्यामुळे नागरिकांसह आरोग्य आणि स्वच्छता कर्मचाऱ्यांमध्ये देखील याची भीती असल्याचं दिसत आहे. याच भीतीमुळे नागपूरमध्ये निर्जंतुकीकरणाचं काम मंदावलं. त्यामुळे यावर उपाय म्हणून स्वतः नगराध्यक्षांनीच पाठीवर पंप घेऊन फवारणीचं काम केलं. यामुळे कर्मचाऱ्यांच्या मनातली भितीही कमी झाल्याचं पाहायला मिळालं (Corporator do Disinfectant spraying in Nagpur). आता नागपूरमध्ये निर्जंतूक फवारणीच्या कामाला चांगलाच वेग आला आहे. राजेश रंगारी असं या नगराध्यक्षांचं नाव आहे. या पुढाकाराची नागपूरमध्ये सध्या चांगलीच चर्चा सुरु आहे.

महादुला शहरात निर्जंतूक करण्याचं काम स्वतः नगराध्यक्षांनीच केल्याने अनेक कर्मचाऱ्यांनी स्वतःहून पुढे येऊन या कामाला सुरुवात केली आहे. शहराचे नगराध्यक्ष राजेश रंगारी यांनी कर्मचाऱ्यांच्या मनातली कोरोना संसर्गाची भीती घालवण्यासाठी हा निर्णय घेतला. या अटीतटीच्या काळात सर्वच नागरिक घाबरुन गेलेले असताना अशाप्रकारे स्वच्छता कर्मचाऱ्यांच्यासोबत राहून काम केल्यानं रंगारी यांचं सर्वत्र कौतुक होत आहे.

एकूणच महाराष्ट्रात कोरोना विषाणूचा वाढता संसर्ग लक्षात घेता आता छोट्या शहरांमध्येही निर्जंतुकीकरणाला वेग आला आहे. राज्याचे मुख्यमंत्री उद्धव ठाकरे यांनीही जनतेला सजग राहण्याचं आवाहन केलं आहे. हा राज्यासाठी कोरोनाचा संवेदनशील आणि निर्णायक काळ असल्यानं नागरिकांनी अधिक जबाबदारीनं वागण्याचं आवाहन मुख्यमंत्र्यांनी केलं आहे. मुख्यमंत्र्यांच्या आदेशाने सरकारची आरोग्य यंत्रणाही कामाला लागली आहे. त्याचाच भाग म्हणून आता अगदी गल्ल्यांमध्ये जाऊन किटकनाशक फवारणीचं काम युद्ध पातळीवर सुरु आहे.

संबंधित बातम्या :

Corona LIVE: दिवसभरातील महत्त्वाच्या घडामोडी

LockDown Effect | वैतागलेल्या तळीरामांनी चखना चोरला; मग दारु चोरीचा प्रयत्न, पदरी पडली घोर निराशा

Corona Virus | कोरोनाला रोखण्यासाठी मलेरियाचं औषध सज्ज, ICMR ची मंजुरी

डोंबिवलीत राजकीय कुटुंबाच्या लग्नात कोरोनाबाधित व्यक्ती, महापौरांसह नगरसेवकांनाही क्वारंटाईनचा सल्ला