देवेंद्र फडणवीसांची मोठी घोषणा! २५ टक्के अग्नीविरांचा पोलीस दलात समावेश करणार; मंत्रिमंडळ बैठकीत निर्णय

महाराष्ट्राचे मुख्यमंत्री देवेंद्र फडणविसांनी मोठी घोषणा केली आहे. २५ टक्के अग्नीविरांना पोलीस दलात समावून घेणार असल्याचे ते म्हणाले आहेत. महायुती सरकारच्या मंत्रिमंडळ बैठकीत हा निर्णय घेण्यात आला आहे. तसेच महाराष्ट्रातील दुष्काळासंदर्भातही मोठा निर्णय घेण्यात आला आहे. यामुळे मोठा दिलासा मिळणार आहे.

यावेळी माध्यमांशी संवाद साधताना मुख्यमंत्री देवेंद्र फडणवीस म्हणाले की, दुष्काळाच्या संदर्भात काही मंत्र्‍यांनी त्यांच्या विभागातील तालुक्यांत पीक करपले तरी निकषांत बसलेले नाहीत. त्यांनाही मदत करण्याची मागणी केली आहे. या संदर्भात अशा तालुक्यात ट्रिगर २ मधील काही निकष आणि त्या ही निकषात ते बसत नसतील, तरी त्यांना दुष्काळाचा सर्व फायदे द्यायचे, अशी कार्यप्रणाली आज ठरलेली आहे. याची देखरेख उपसमिती करणार आहे. यामुळे कोणत्या तालुक्यावर किंवा शेतकऱ्यावर अन्याय झाला असेल तर त्यांना न्याय देता येईल. आम्ही फक्त तालुकेच नाही तर मंडळ स्थरावर देखील जाण्याचा प्रयत्न केला आहे, त्यांनी सांगितले आहे.

ते म्हणाले की, आज पहिली अग्नीविरांची बॅच ही त्यांचा कार्यकाळ संपवून परत येणार आहेत. त्या बॅचमधील २५ टक्के अग्नीवीर हे सेनेतच राहतील. तसेच ७५ टक्के अग्निवीर केंद्र आणि राज्य सरकारच्या विविध फोर्समध्ये घेतले गेले पाहिजेत. म्हणून आम्ही असा निर्णय घेतला आहे की, यातील २५ टक्के अग्निवीर पोलीस दलात समाविष्ट करण्यात येणार आहेत. त्यांच्यासाठी कोणतीही परीक्षा अथवा ट्रेनिंगची अट असणार नाही. त्यांना वयात चार वर्षांची सूट देण्यात येणार आहे.

फडणवीस म्हणाले की, ते फायरमन म्हणून गेले तर त्यांनी तीन महिन्याचं ट्रेनिंग एका वर्षात घ्यावे. असं बंधन आपण त्यांच्यावर टाकणार आहोत.तसेच कुठे पदे कमी पडली तर त्याठिकाणी जास्त पदे करण्याचे ठरवले आहे. जितक्या अग्नीविरांना शासनामध्ये यायचे आहे, त्या सर्वांना आपण सामावून घेणार आहोत. नेव्हीमधून जे येणार आहेत त्यांची कोस्टल सिक्युरिटीमध्ये गरज आहे. त्यामुळे पदांची शिथिलता करून त्यांचा समावेश करून घेण्याचा निर्णय घेण्यात आला आहे.

आपण १० टक्क्याचं आरक्षण अग्निविरांना दिले आहे. माजी सैनिक कॅटेगिरीतही त्यांना सूट मिळणार आहे. तेथील पदांमध्ये अग्निविरांना आपण प्राधान्य देणार आहोत. महाराष्ट्रातील अग्निवीर जे परत येतील त्यातील ज्यांची शासनात काम करण्याची इच्छा आहे, त्यांच्या अनुभवाचा फायदा राज्य शासन घेईल. सगळ्या अग्नीविरांना आम्ही राज्य शासनात समाविष्ट करू, असं आश्वासन देवेंद्र फडणविसांनी दिले आहे.