भाजपमध्ये जाण्यासाठी शरद पवार यांना…एकनाथ खडसे काय बोलून गेले

जळगाव | 13 मार्च 2024 : कधीकाळी भाजपचे ज्येष्ठ नेते म्हणून ओळखले जाणारे आमदार एकनाथ खडसे पुन्हा शरद पवार यांच्या राष्ट्रवादीतून भाजपमध्ये जाणार असल्याची चर्चा सुरु झाली आहे. या चर्चांना अधिक जोर देणारे वक्तव्य एकनाथ खडसे यांनी केले. यावेळी त्यांनी आपले राजकीय विरोधक गिरीश महाजन यांच्यावर निशाणा साधला. आपण भाजपमध्ये जेव्हा केव्हा जाऊ तेव्हा आधी शरद पवार यांना कळवेल. शरद पवार यांच्या संमतीने भाजपमध्ये जाईल, असे एकनाथ खडसे यांनी म्हटले आहे. भाजपमध्ये जाणार असल्याच्या चर्चांवर एकनाथ खडसे यांनी हे मोठे विधान केले. सध्या भाजपमध्ये जाण्याचं कुठलंही महत्वाचे कारण नाही आणि माझी इच्छा ही नाही, अशी पुष्टी त्यांनी त्यानंतर जोडली.

पवार साहेबांच्या सल्ल्याने जाईल

राष्ट्रवादी काँग्रेसचे आमदार एकनाथ खडसे यांनी भाजपमधील घरवापसीच्या त्यांच्या सुरू असलेल्या चर्चेवर महत्वाचे वक्तव्य केले आहे. एकनाथ खडसे म्हणाले की, मी लपून-छपून जाणार नाही. ज्यावेळी भाजपमध्ये जाईल तेव्हा उघडपणे जाईल. तसेच पवार साहेबांच्या सल्ल्याने जाईल, असे वक्तव्य एकनाथ खडसे यांनी केले.

गिरीश महाजन यांना टोला

भाजपमध्ये जाण्याबाबत मला मंत्री गिरीश महाजन यांच्या परवानगीची गरज नाही. मी 40-42 वर्षांपासून भाजपमध्ये होतो. त्यामुळे गिरीश महाजन यांच्यापेक्षा माझे वरिष्ठांची चांगले संबंध आहेत. ते आजही कायम आहेत. पक्षाच्या तत्त्वाशी मतभेद असू शकतात मात्र व्यक्ती म्हणून माझे कोणाशी मतभेद नाही. मोदीजी, नड्डाजी, राजनाथ सिंहजी यांना मी कधी भेटलो नाही, असेही नाही. रक्षा खडसे माझ्या घरात खासदार आहेत. त्यामुळे त्यांच्याशी माझा भेटीगाठी होत असतात ते स्वाभाविक आहे.

आता जमीनही जमा झालीय

भाजपमध्ये जाण्यासाठी पाच वर्षांची आमदारकी सोडून जाणे एवढं काही मोठे कारण आता नाही. ईडीचा विषय आता नाही. मला नोटीस आल्या माझ्या जमिनी जमा झाले आहे. त्यामुळे गेलो असतो तर तेव्हाच गेलो असतो, असे खडसे म्हणाले. सध्या माझी मनापासून भाजपमध्ये जाण्याची इच्छा नाही. जेव्हा माझी इच्छा होईल तेव्हा मी पवार साहेबांना कळवेल, असे खडसे यांनी म्हटले.

नड्डाजी यांच्याशी माझे संबंध

माझे सरळ संबंध नड्डाजी यांच्याशी आहे. हे मी कधी लपवून ठेवलेलं नाही. पवार साहेबांना सुद्धा ते माहीत आहेत. माननीय शरद पवार साहेबांनी मला सहा वर्षांसाठी आमदारकी अशा काळात मिळवून दिली आहे. त्यावेळी अंधारात होतो. आजपर्यंत पवार साहेबांच्या सल्ल्याशिवाय मी कुठलीही गोष्ट केलेली नाही.