Vasant More : तात्या मरण्याआधी मला एकदातरी..त्या शिवसैनिकाचे शब्द वसंत मोरेंच्या मनाला भिडले, त्यांनी लगेच हलवली सूत्र

सध्या राजकीय आखाड्यात उद्धव ठाकरे यांच्या शिवसेनेची मोठी पडझड सुरु आहे. आधी सहा खासदार फुटले मग विधान परिषदेतील एक आमदार फुटला. 2022 नंतर पुन्हा एकदा उद्धव ठाकरेंसमोर आव्हानात्मक स्थिती निर्माण झाली आहे. एकनाथ शिंदे यांच्या झंझावातासमोर कसं टिकून रहायचं, हाच सध्या ठाकरे गटातील नेत्यांसमोरचा मुख्य प्रश्न आहे. कारण ठाकरे गटातून फक्त खासदार, आमदार फुटत नाहीयत, तर स्थानिक पातळीवरचे पदाधिकारी, कार्यकर्तेही पक्ष सोडून चालले आहेत. मागच्या चारवर्षांपासून पक्षाला लागलेली गळती थांबतच नाहीय. पक्ष सोडणारे बहुतांश जण एकनाथ शिंदे यांच्या नेतृत्वावर विश्वास दाखूवन त्यांच्या शिवसेनेत प्रवेश करत आहेत. सचिन अहिर यांनी शिंदेंसोबत जाण्याचा निर्णय घेतल्यानंतर वरळीमध्ये डॅमेज कंट्रोलसाठी ठाकरे गटाला बैठका घ्याव्या लागल्या.

उद्धव ठाकरे यांनी जुन्या शिवसैनिकांना एकत्र करण्याचं आवाहन केलं आहे. त्यासाठी शाखा-शाखांवर आता जुन्या शिवसैनिकांचे मेळावे सुरु झाले आहेत. या दरम्यान आता पुणे शहरप्रमुख वसंत मोरे ज्येष्ठ शिवसैनिकांना घेऊन मातोश्रीवर येणार आहेत. ठाकरे सेनेतील पडझडीनंतर ज्येष्ठ शिवसैनिक आता मातोश्रीवर जाणार आहेत. पुण्यातील 130 ज्येष्ठ शिवसैनिक मातोश्रीवर येणार आहेत. “एकाबाजूला आपण पाहिलं खुर्चीसाठी, सत्तेसाठी पक्ष सोडणारे आहेत. दुसऱ्याबाजूला बाळासाहेबांच्या खुर्चीचं दर्शन घ्यायचय म्हणून आसुसलेले चेहरे आहेत” असं वसंत मोरे म्हणाले.

घेऊन या म्हणून परवानगी दिली

“मी मागच्या महिन्यात जुन्या शिवसैनिकांचा मेळावा घेतला होता. त्यावेळी अनेक शिवसैनिक विनंती करत होते की, तात्या आता तुम्ही पुणे शहर प्रमुख झालात, निदान तुमच्याकाळात तरी आम्हाला बाळासाहेबांच्या खुर्चीचं दर्शन होऊं दे. एक शिवसैनिक तर असं म्हणाला की, तात्या मरण्याआधी मला बाळासाहेबांच्या खुर्चीच दर्शन घडवा. मी विनायक राऊत साहेबांमार्फत उद्धव साहेबांपर्यंत ही गोष्ट पोहोचवली. त्यानंतर साहेबांनी घेऊन या म्हणून परवानगी दिली” अशी माहिती पुणे शहर प्रमुख वसंत मोरे यांनी दिली. वसंत मोरे आधी महाराष्ट्र नवनिर्माण सेनेमध्ये होते. मनसेचे ते पुण्यातील चर्चित नगरसेवक होते. पक्षांतर्गत मतभेद झाल्यामुळे त्यांनी मनसे सोडून उद्धव ठाकरे यांच्या शिवसेनेत प्रवेश केला.