Hingoli News : शस्त्रक्रियेनंतर 43 महिलांना थंडीच्या कडाक्यात झोपवले जमिनीवर; धक्कादायक प्रकारानंतर यंत्रणा खडबडून जागी, संतोष बांगर यांच्या भूमिकेने आश्चर्य

हिंगोलीतील आरोग्य यंत्रणेचा गलथान कारभार पुन्हा एकदा समोर आला आहे. भर थंडीत शस्त्रक्रियेनंतर 43 महिलांना जमिनीवर झोपवल्या गेले. 13 डिसेंबर रोजी कुटुंब कल्याण योजना शिबिरात महिलांना थंडीच्या काळात थेट जमिनीवर झोपावे लागले. थंडगार फरशीवर महिलांना झोपण्याची व्यवस्था केल्याचा व्हिडिओ समोर आला. शस्त्रक्रियेनंतर झोपण्यासाठी रुग्णालयात कॉट उपलब्ध नसल्याने महिलांना जमिनीवर झोपण्याची वेळ आली. कळमनुरी तालुक्यातील बाळापूर ग्रामीण रुग्णालयात हा प्रकार घडला. याविषयीचा व्हिडिओ व्हायरल झाल्यानंतर आरोग्य यंत्रणा खडबडून जागी झाली. चूक दुरूस्त करण्याचा प्रयत्न करण्यात आला. पण या घटनेवर आमदार संतोष बांगर यांच्या भूमिकेने सर्वांनाच आश्चर्याचा धक्का बसला.

काय घडली घटना

काल शुक्रवारी ग्रामीण भागातील महिलांवर कुटुंब नियोजन शस्त्रक्रिया करण्यात आली. पण बेड नसल्याने यातील 43 महिलांना थेट फरशीवर झोपवण्यात आले. ऐन थंडीच्या कडाक्यात महिलांना फरशीवर झोपावे लागले. आरोग्य यंत्रणेचा गलथान कारभार समोर आला. या सर्व घटनेनंतर नागरिकांनी आरोग्य खात्यावर रोष व्यक्त केला. शस्त्रक्रियेनंतर स्वच्छेतेबाबतही काळजी न घेतल्याने नाराजीचा सूर वाढला. पण यंत्रणा हालली नाही. पण जेव्हा याविषयीचे वृत्त प्रसिद्ध झाले. त्यावेळी यंत्रणा खडबडून जागी झाली. या हलगर्जीपणाबाबत रुग्णालयावर आणि अधिकाऱ्यांवर कारवाई करण्याची मागणी आता करण्यात येत आहे.

नातेवाईकांना अश्रू अनावर

कळमनुरी तालुक्यातील आखाडा बाळापूर ग्रामीण रुग्णालयात शस्त्रक्रिया झाल्यानंतर तब्बल 43 महिलांना जमिनीवरती झोपवण्यात आले. आता महिलांना डिस्चार्ज करण्यात आलं आहे. महिलांच्या नातेवाईकांच्या प्रतिक्रिया जाणून घेतल्या असत्या. नातेवाईकांना त्यांचे अश्रू लपवता आले नाही. पण यंत्रणेला सुरुवातीला कोणताही पाझर फुटला नाही. वृत्त समोर आल्यानंतर यंत्रणा जागी झाली.

यंत्रणा खडबडून जागी, चुक सुधारली

बाळापुर घटनेनंतर आरोग्य विभाग खड़बडून जागा झाला. जिल्हा शल्यचिकित्सकांसह जिल्ह्याच पथक बाळापूर ग्रामीण रुग्णालयात दाखल घडलेल्या घटनेनंतर अधिकचे 20 बेड वाढवणार असल्याची माहिती जिल्हा शल्यचिकित्सक नितिन तडस यांनी दिली आहे.

संजय बांगर यांची प्रतिक्रिया काय?

आखाडा बाळापूर येथे घडलेला प्रकार धक्कादायक नाही. त्यात आरोग्य विभागाने कोणताही हलगर्जीपणा केला नाही, अशी प्रतिक्रिया आमदार संतोष बांगर यांनी दिली. येथील आरोग्य केंद्राला, रुग्णालया आपण अनेकदा भेट दिली. महिलांची संख्या जास्त होती आणि वेळ कमी असल्याने जमिनीवर गाद्या टाकून महिलांची सोय करण्यात आल्याची भूमिका त्यांनी घेतली.