रातोरात श्रीमंत होण्याचं स्वप्न महागात, पुण्यातील कंपनीने लावला 23 कोटींचा चुना

राज्यात गेल्या काही दिवसांपासून सातत्याने फसवणुकीच्या विविध घटना घडत आहेत. त्यातच आता जादा परताव्याचे आमिष दाखवून राज्यातील हजारो गुंतवणूकदारांना कोट्यवधी रुपयांना लुटल्याचा धक्कादायक प्रकार समोर आला आहे. ‘टीडब्ल्यूजे (TWJ) असोसिएट्स प्रा. लि. पुणे’ या कंपनीच्या जळगावमधील कारभाराचा पोलिसांनी पर्दाफाश केला आहे. जळगावमधील २७९ गुंतवणूकदारांची तब्बल २३ कोटी ८१ लाख रुपयांची फसवणूक केल्याप्रकरणी जिल्हापेठ पोलिसांनी मोठी कारवाई केली आहे. त्यांनी कंपनीच्या जळगाव शाखेचा मुख्य एजंट मिलिंद शालिकराव पाटील याला अटक केली आहे.

नेमके प्रकरण काय?

पुणे स्थित असलेल्या टीडब्ल्यूजे असोसिएट्स कंपनीने जळगाव शहरात आपली शाखा उघडून शेअर मार्केट ट्रेडिंगच्या नावाखाली गुंतवणुकीचे जाळे विणले होते. आमच्या कंपनीत गुंतवणूक करा आणि घरबसल्या खात्रीशीर मोठा परतावा मिळवा, असे आमिष एजंटमार्फत नागरिकांना दाखवण्यात आले. सुरुवातीला काही जणांना परतावा देऊन विश्वास संपादन करण्यात आला. ज्यामुळे गुंतवणूकदारांचा ओघ वाढला. मात्र, गेल्या काही महिन्यांपासून गुंतवणूकदारांना मुद्दल आणि परतावा मिळणे बंद झाले. तेव्हा फसवणुकीचा हा प्रकार उघडकीस आला.

राज्यभर पसरलेली फसवणुकीची पाळेमुळे

या कंपनीचे मुख्य संचालक समीर सुभाष नार्वेकर आणि नेहा समीर नार्वेकर यांनी केवळ जळगावातच नव्हे, तर संपूर्ण महाराष्ट्रात फसवणुकीचे मोठे रॅकेट चालवले असल्याचे तपासात समोर आले आहे. त्यांच्यावर पुणे, ठाणे, नवी मुंबई, नागपूर, रत्नागिरी आणि छत्रपती संभाजीनगर यांसारख्या प्रमुख शहरांमध्ये गंभीर स्वरूपाचे गुन्हे दाखल आहेत.

याप्रकरणी ठाणे पोलिसांनी ३० जानेवारी २०२६ रोजी मुख्य सूत्रधार समीर आणि नेहा नार्वेकर यांना अटक केली होती. सध्या ते नागपूर पोलिसांच्या ताब्यात आहेत. त्यांच्या चौकशीतून राज्यातील इतर शहरांमधील फसवणुकीचे धागेदोरे हाती लागत आहेत. दरम्यान, जळगावातील गुन्ह्यात सहभागी असलेला स्थानिक मुख्य एजंट मिलिंद पाटील पोलिसांच्या जाळ्यात अडकला आहे. यामुळे आता जळगावमधील गुंतवणूकदारांना त्यांचे पैसे परत मिळण्याची आशा निर्माण झाली आहे. या प्रकरणी जिल्हापेठ पोलीस अधिक तपास करत आहेत. तसेच फसवणूक झालेल्या इतर गुंतवणूकदारांनी देखील पोलिसांशी संपर्क साधण्याचे आवाहन करण्यात आले आहे.