परीक्षेआधीच पेपर फुटला?, शिंदेंच्या संभाव्य मंत्र्यांची यादी समोर!

उद्या नव्या सरकारचा शपथविधी सोहळा होणार आहे. मुंबईतील आझाद मैदानावर देवेंद्र फडणवीस हे तिसऱ्यांदा मुख्यमंत्रिपदाची शपथ घेणार आहेत. त्यापूर्वी आज महायुतीच्या गोटात घडामोडींना वेग आला आहे. आज भाजपकडून पक्षाच्या विधिमंडळ गटनेतेपदी देवेंद्र फडणवीस यांची निवड करण्यात आली आहे. त्यानंतर महायुतीमधील प्रमुख नेते देवेंद्र फडणवीस, एकनाथ शिंदे आणि अजित पवार यांनी राज्यपालांकडे जाऊन सत्ता स्थापनेचा दावा केला. आमदारांच्या पाठिंब्याचं पत्र राज्यपालांना यावेळी देण्यात आलं. उद्या सायंकाळी पाच वाजेचा वेळ राज्यपालांकडून शपथविधीसाठी देण्यात आला आहे.

दरम्यान देवेंद्र फडणवीस हे मुख्यमंत्री म्हणून शपथ घेणार आहेत, या सरकारमध्ये देखील जुनाच पॅटर्न कायम राहणार असून राज्यात एक मुख्यमंत्री आणि दोन उपमुख्यमंत्री असणार आहेत. देवेंद्र फडणवीस यांच्यासोबत एक उपमुख्यमंत्री म्हणून अजित पवार शपथ घेणार आहेत. मात्र एकनाथ शिंदे हे उपमुख्यमंत्रिपदाची शपथ घेणार की नाही हे अजूनही गुलदस्त्यात आहे. समोर येत असलेल्या माहितीप्रमाणे एकनाथ शिंदे हे गृहमंत्रिपदासाठी आग्रही आहेत, मात्र दुसरीकडे गृहमंत्रिपद सोडण्यास भाजप देखील तयार नाही. त्यामुळे उद्या एकनाथ शिंदे हे उपमुख्यमंत्रिपदाची शपथ घेणार की नाही? हे पाहाणं महत्त्वाचं ठरणार आहे.

उद्या मुख्यमंत्री आणि दोन उपमुख्यमंत्र्यांसोबतच काही मंत्री देखील शपथ घेणार आहेत. मात्र उद्या कोण-कोण शपथ घेणार हे मात्र अजूनही समोर आलेलं नाही, परंतु दुसरीकडे एकनाथ शिंदे हे उपमुख्यमंत्रिपद स्विकारणार की नाही स्विकारणार हे अद्याप अस्पष्ट असताना शिवसेनेच्या संभाव्य मंत्र्याची यादी समोर आली आहे. सूत्रांकडून मिळालेल्या माहितीनुसार शिवसेनेकडून उदय सामंत, शंभूराज देसाई , गुलाबराव पाटील व दादा भुसे यांना पुन्हा मंत्रिपद मिळण्याची शक्यात आहे.