महायुती आज सत्तास्थापनेचा दावा करणार; गटनेता निवडीबाबत भाजपची बैठक

महाराष्ट्रातील विधानसभा निवडणुकीचा निकाल लागून 11 दिवस झाले आहेत. असं असताना अद्यापपर्यंत नव्या सरकारचा शपथविधी झालेला नाही. किंबहुना राज्याच्या मुख्यमंत्र्यांचं नाव देखील जाहीर झालेलं नाही. तर आता आज सत्तास्थापनेचा दावा करण्यात येणार आहेत. महायुतीचे महत्त्वाचे नेते सत्तास्थापनेचा दावा करण्यासाठी राज्यपालांच्या निवासस्थानी जाणार आहेत. भाजपच्या गटनेतेपदी कोण असणार? याबाबतची स्पष्टता नाहीये. गटनेतापदी कोण असणार? याबाबत भाजपची आज महत्त्वाची बैठक होणार आहे. या बैठकीसाठी भाजपचे निरीक्षक विजय रुपाणी, निर्मला सीतारमण हे कालच मुंबईत दाखल झाले आहेत.

शिंदे- फडणवीसांमध्ये चर्चा

एकनाथ शिंदे आणि देवेंद्र फडणवीस यांच्यात काल ‘वर्षा’ या मुख्यमंत्र्यांच्या निवासस्थानी बैठक झाली आहे. अर्धातास या दोन नेत्यांमध्ये चर्चा झाली. शपथविधी सोहळ्याआधी शिंद- फडणवीसांमध्ये चर्चा झाली. यावेळी गिरीश महाजनदेखील उपस्थित होते. एकनाथ शिंदे आणि गिरीश महाजनांमध्ये बंद दाराआड 30 मिनिटं चर्चा झाली. खातेवाटप, शपथविधी आणि इतर मुद्द्यांवर चर्चा झाली आहे. ‘वर्षा’ बंगल्यावरच्या बैठकीनंतर गिरीश महाजनांनी ‘सागर’ बंगल्यावर जात देवेंद्र फडणवीस यांची भेट घेतली.

मागच्या काही दिवसांपासून मुख्यमंत्रिपदाचा आग्रह करणाऱ्या एकनाथ शिंदेंनी त्यांचा निर्णय बदलल्याची माहिती आहे. उपमुख्यमंत्रिपद स्विकारण्याचा निर्णय एकनाथ शिंदे यांनी घेतल्याची माहिती आहे. देवेंद्र फडणवीसांच्या भेटीनंतर शिंदेंनी उपमुख्यमंत्रिपद स्विकारण्याचा निर्णय घेतल्याची माहिती आहे. तर गृहमंत्रिपदावरून मागच्या काही दिवसांपासूनरस्सीखेच सुरु आहे. त्यावरही तोडगा निघाल्याची माहिती आहे. गृहखात्याऐवजी नगरविकास खातं आणि आणखी एखादं महत्वाचं खास शिंदे गटाला दिलं जाणार असल्याची माहिती आहे.

शपथविधी सोहळ्याला साधू महंताना निमंत्रण

मुख्यमंत्री आणि महायुती सरकारच्या शपथविधी सोहळ्यासाठी राज्यभरातील 400 साधू महंताना निमंत्रण देण्यात आलं आहे. नाशिकमधून देखील अनेक साधू महंत उपस्थित राहणार आहेत. अध्यात्मिक आघाडीचे प्रमुख तुषार भोसले यांच्याकडून निमंत्रण देण्यात आलं आहे. नाशिकमधून महंत सुधिरदास महाराज, महंत अनिकेत शास्त्री महाराज, महंत भक्तीचरणदास , रामकृष्ण महाराज लहवितकर, संजय धोंगडे , माधवदास राठी यांच्यासह अनेक साधू महंत उपस्थित राहणार आहेत.