महापालिका निकालांनंतर सत्तासंघर्षाचा सुपर फ्रायडे, राज्याच्या 8 महापालिकांत आज महापौरांची निवड, कुठे कोणाचे पारडं जड?

राज्यातील महापालिका निवडणुका नुकत्याच पार पडल्या. या निवडणुकीचा निकाल लागल्यानंतर आता सर्वत्र महापौर आणि उपमहापौर पदासाठीची चुरस रंगणार आहे. राज्यातील महापालिका निवडणुकीनंतर आजचा राजकीय पटलावरचा अत्यंत महत्त्वाचा दिवस उजाडला आहे. जळगाव, धुळे, कोल्हापूर, पिंपरी-चिंचवड, नागपूर, अमरावती, सोलापूर आणि नाशिक या ८ महत्त्वाच्या महानगरपालिकांमध्ये आज महापौर आणि उपमहापौर पदासाठी निवड प्रक्रिया पार पडत आहे. सकाळी ११ वाजल्यापासून विशेष सर्वसाधारण सभांना सुरुवात होणार आहे. त्यामुळे अनेक शहरांत कांटे की टक्कर पाहायला मिळत आहे.

शहरनिहाय राजकीय समीकरणे आणि चुरशीच्या लढती

नागपूर महापालिका 

राज्याची उपराजधानी असलेल्या नागपुरात महापौरपसाठी ‘ठाकरे’ विरुद्ध ‘ठाकरे’ असा सामना रंगताना दिसत आहे. त्यामुळे ही लढाई प्रतिष्ठेची बनली आहे. भाजपने कुणबी कार्ड खेळत निता ठाकरे यांना रिंगणात उतरवले आहे, तर काँग्रेसने स्नेहल ठाकरे यांच्या माध्यमातून तगडे आव्हान दिले आहे. भाजपचे संख्याबळ ८४ असले तरी काँग्रेस ४१ जागा आहेत. त्यामुळे काही अनपेक्षित खेळी होते का, याकडे सर्वांचे लक्ष आहे.

पिंपरी-चिंचवडमध्ये महापौर बिनविरोध, उपमहापौरपदासाठी अंतर्गत पेच

पिंपरी-चिंचवडमध्ये भाजपने स्पष्ट बहुमत मिळवले असून महापौरपदासाठी रवी लांडगे यांचा एकमेव अर्ज आल्याने त्यांची निवड बिनविरोध झाली आहे. मात्र, उपमहापौरपदासाठी महायुतीतच बिघाडी पाहायला मिळत आहे. भाजपच्या शर्मिला बाबर यांच्या विरोधात राष्ट्रवादी काँग्रेस (अजित पवार गट) च्या वैशाली काळभोर यांनी अर्ज दाखल केल्याने येथे मतदान रंगणार आहे.

नाशिक आणि सोलापुरात सत्तेसाठी रस्सीखेच

नाशिक महापालिका निवडणुकीत भाजपच्या हिमगौरी आडके यांच्यासमोर शिवसेना (ठाकरे गट) च्या सीमा पवार यांनी आव्हान उभे केले आहे. बहुमताचा आकडा गाठण्यासाठी अपक्षांची भूमिका कळीची ठरेल. तर सोलापुरात मित्रपक्षांमध्येच सामना पाहायला मिळत आहे. महापौरपदासाठी भाजपचे विनायक कोंडीयाल आणि शिवसेना (शिंदे गट) चे प्रियदर्शन साठे आमनेसामने आहेत.

अमरावतीत रंगतदार तिरंगी चुरस

अमरावतीत महापौरपदासाठी भाजपचे श्रीचंद तेजवाणी आणि काँग्रेसचे संजय शिरभाते यांच्यात थेट लढत आहे. उपमहापौरपदासाठी मात्र युवा स्वाभिमानचे सचिन भेंडे, काँग्रेसच्या लुबना तनवीर आणि बसपाचे सचिन वैद्य यांच्यात त्रिकोणी संघर्ष पाहायला मिळत आहे.

जळगाव, धुळे आणि कोल्हापुरात औपचारिकता बाकी

जळगाव: महायुतीच्या सूत्रानुसार दिपमाला काळे (भाजप-महापौर) आणि मनोज चौधरी (शिवसेना-उपमहापौर) यांची निवड निश्चित मानली जात आहे.

धुळे: भाजपने पूर्ण वर्चस्व राखले असून मायदेवी परदेशी (महापौर) आणि ज्योत्सना पाटील (उपमहापौर) यांची निवड केवळ औपचारिकता आहे.

कोल्हापुरात येथे रुपाराणी निकम (महापौर) आणि दुर्वास कदम (उपमहापौर) आज पदभार स्वीकारतील.

पाहा व्हिडीओ :