धाकधुकीनंतर अखेर ठाकरेंच्या शिलेदाराचा निकाला लागला, मिलिंद नार्वेकर यांचा विजय

Milind Narvekar : विधान परिषदेच्या 11 जागांसाठी आज मतदार पार पडलं. या निवडणुकीत शिवसेना उद्धव ठाकरे पक्षाकडून मिलिंद नार्वेकर निवडणुकीच्या रिंगणात होते. मिलिंद नार्वेकर हे उद्धव ठाकरे यांचे स्वीय सचिव आहेत. मिलिंद नार्वेकर हे उद्धव ठाकरे यांच्या जवळचे मानले जातात. त्यामुळे ठाकरे गटासाठी ही निवडणूक प्रतिष्ठेची होती. उद्धव ठाकरे यांचे विश्वासू असलेले नार्वेकर यांना 23 मते मिळाली आहेत. त्यांना विजयासाठी एका मताची गरज होती. अखेर दुसऱ्या पंसतीच्या मतांमध्ये त्यांचा विजय झाला आहे. आजपर्यंत ते पडद्यामागे राहून काम करत आले आहेत. पहिल्यांदाच ते निवडणुकीच्या रिंगणात आहेत. 11 जागांसाठी 12 जण निवडणुकीच्या रिंगणात असल्याने निवडणूक चुरशीची झाली होती.

विधानपरिषद निवडणुकीच्या मतदानाआधी शिवसेना शिंदे गटाचे नेते संजय शिरसाट यांनी महत्त्वाचं वक्तव्य केलं होते. बारावा खेळाडू मिलिंद नार्वेकर यांना कमजोर समजू नका, असं संजय शिरसाट यांनी टीव्ही 9 मराठीशी बोलताना म्हटलं होतं.

मिलिंद नार्वेकर यांनी विधान परिषद निवडणुकीच्या वेळी प्रतिज्ञापत्रातून त्यांची संपत्ती उघड केली आहे. दहावी पास असलेल्या नार्वेकर यांच्याकडे कोट्यावधींची संपत्ती आहे.

नार्वेकर यांच्यावर एकही गुन्हा दाखल नाहीये. याशिवाय त्यांच्याकडे 74 लाख 13 हजार रुपये बँकेच्या खात्यात जमा आहेत. पत्नीच्या खात्यात 8 कोटी 22 लाख 118 रुपये आहेत. बॉण्ड्स किंवा म्युचअल फंडात 50 हजार रुपये आहेत. इतर पॉलिसीमधील गुंतवणूक ही 3 लाख 68 हजार 729 रुपये इतकी आहे. पत्नीची गुंतवणूक 67 लाख 88 हजार 558 रुपये आहे. त्यांच्यावर वैयक्तिक कर्ज 26 लाख 38 हजार 160 रुपये इतके आहे. तर पत्नीवर 3 कोटी 22 लाख 45 हजार रुपये इतके कर्ज आहे. त्यांच्यावर 1 कोटी 54 लाख 81 हजार 989 रुपये इतके बँकेचे लोन आहे. त्यांच्याकडे एकही गाडी नाहीये.

माझ्या आई वडिलांच्या आणि शिवसेना प्रमुख, हिंदुहृदयसम्राट बाळासाहेब ठाकरे ह्यांच्या आशीर्वादाने तसेच पक्षप्रमुख मा. श्री. उद्धव बाळासाहेब ठाकरे ह्यांच्या पाठींब्यामुळे आज मी विधानपरिषदेचा अर्ज भरला. pic.twitter.com/WaKW5HzSYb

— Milind Narvekar (@NarvekarMilind_) July 2, 2024

71 लाख 28 हजार 189 रुपयांचे दागिने त्यांच्याकडे आहेत. तर पत्नीकडे 67 लाख 61 हजार 420 रुपये इतके दागिने आहेत. रत्नागिरीत मुरुडमध्ये त्यांच्याकडे 74.80 एकर जमीन आहे. मालाड आणि बोरिवलीमध्ये 1000 स्क्वेअर फुटांचं घर आहे. अलिबागमध्ये पत्नीच्या नावावर फार्महाऊस आहे. तर वैयक्तिक पगार, घराचं भाडं, व्यावसायिक मिळकत, विविध कंपन्यांच्या शेअर्स यातून ते कमाई करतात.