ठाकरे सिनेमाची निर्मिती शिवसेनेकडून, पण सारथ्य मनसेकडे!

मुंबई : दिवंगत शिवसेना प्रमुख बाळासाहेब ठाकरे यांच्या आयुष्यावर आधारित ठाकरे सिनेमाची उत्सुकता शिगेला पोहोचली आहे. या सिनेमाच्या स्पेशल स्क्रीनिंगचं आयोजन करण्यात आलंय. मात्र 25 तारखेला हा सिनेमा प्रेक्षकांना थिएटरमध्ये पाहता येईल. शिवसेना खासदार संजय राऊत यांनी स्वतः लक्ष घालून हा सिनेमा तयार करुन घेतलाय.

संजय राऊत यांनी बाळासाहेबांना जवळून पाहिलेलं आहे. त्यामुळे सिनेमात कोणतीही उणीव राहणार नाही याची काळजी संजय राऊत यांनी घेतलेली आहे. या सिनेमातली विशेष बाब म्हणजे मनसे नेते आणि प्रसिद्ध दिग्दर्शक अभिजित पानसे यांनी सिनेमाचं दिग्दर्शन केलंय. निर्मिती शिवसेनेची असली तरी सिनेमाचं सारथ्य मात्र मनसेकडून करण्यात आल्याचं बोललं जातंय.

मनसे आणि शिवसेना यांच्यातलं नातं नव्याने सांगण्याची गरज नाही. पण सिनेमासाठी राजकीय मतभेद विसरुन एक कलाकार म्हणून अभिजित पानसे यांनी सिनेमाला पूर्णपणे न्याय देण्याचा प्रयत्न केलाय. मनसेनेही दादरमध्ये पोस्टरबाजी करत फक्त अभिजित पानसे यांना क्रेडिट दिलंय. यामध्ये निर्माते संजय राऊत यांचं कुठेही नाव नव्हतं.

कोण आहेत अभिजित पानसे?

अभिजित पानसे हे प्रसिद्ध सिनेलेखक आणि दिग्दर्शक आहेत. 2014 मध्ये आलेला रेगे हा मराठी सिनेमा प्रचंड गाजला होता. रेगे हे अभिजित पानसे यांचं मोठं यश असल्याचं मानलं जातं. ठाकरे सिनेमासाठीही संजय राऊत यांनी अभिजित पानसे यांची निवड केली. वाचा – ठाकरे सिनेमाचे दिग्दर्शक स्क्रीनिंग अर्ध्यावर सोडून निघून गेले

अभिजित पानसे सिनेमाव्यतिरिक्त राजकारणातही सक्रिय असतात. पानसे यांनी चित्रपट सेनेची जबाबदारी सांभाळलेली आहे. राज ठाकरेंच्या जवळचे नेते म्हणून ते परिचित आहेत. अगोदर शिवसेनेत असलेले अभिजित पानसे नंतर मनसेत आले होते. त्यांनी 2014 ची लोकसभा निवडणूकही लढली होती.

स्पेशल स्क्रीनिंगला पानसे नाराज

मुंबईत सिनेमाचं स्पेशल स्क्रीनिंग झालं. पण या स्क्रीनिंगमध्ये मानापमान नाट्य पाहायला मिळालं. सिनेमाचे दिग्दर्शक अभिजित पानसे यांच्या कुटुंबीयांना पुढच्या रांगेत बसवल्यामुळे पानसे नाराज झाले आणि दिग्दर्शक स्क्रीनिंग अर्ध्यावर सोडून निघून गेले.

मुंबईत होणाऱ्या या स्पेशल स्क्रीनिंगसाठी दिग्गज नेते आणि इतर मान्यवरांना निमंत्रण देण्यात आलेलं आहे. पण स्वतः दिग्दर्शकच नाराज झाल्यामुळे कुजबुज पाहायला मिळाली. अभिजित पानसे यांना सर्वात पुढचं सीट दिल्यामुळे ते नाराज झाल्याचं बोललं जातंय. संजय राऊत यांनी पानसेंची समजूत काढण्याचाही प्रयत्न केला. पण यात त्यांना यश आलं नाही.