Russia-Ukraine War: युक्रेनमधील अडकलेल्या सर्व विद्यार्थ्यांना परत आणा; प्रचितीच्या आई-वडिलांचा टाहो
क्रेनमधील खारकीव येथे प्रचिती आंगणे ही विद्यार्थीनी अजूनही अडकलेली आहे. चार दिवसांपूर्वी तिने एक व्हिडीओ व्हायरल करून आपण बंकर्समध्ये अडकलो असून आपल्याला मदत करावी, असं आवाहन केलं होतं.
मुंबई: युक्रेनमधील (Russia-Ukraine War) खारकीव येथे प्रचिती आंगणे (prachiti angane) ही विद्यार्थीनी अजूनही अडकलेली आहे. चार दिवसांपूर्वी तिने एक व्हिडीओ व्हायरल करून आपण बंकर्समध्ये अडकलो असून आपल्याला मदत करावी, असं आवाहन केलं होतं. मात्र, प्रचितीची अजूनही युक्रेनहून मायदेशी परतली नसल्याने तिचे आईवडील चिंतेत आहेत. आपली मुलगी कधी परत येईल हिच चिंता प्रचितीच्या आईवडिलांना सतावत आहे. सध्या खारकीव येथे रशियन सैन्याचा हल्ला वाढला आहे. भारताचे पंतप्रधान नरेंद्र मोदी (pm narendra modi) यांनी प्रचिती आणि तिच्या सोबत अडकलेल्या आपल्या देशातील इतर विद्यार्थ्यांना देखील लवकरात लवकर सुखरूप मायदेशी आणावे अशी विनंती प्रचितचे वडील प्रशांत आंगणे यांनी केली आहे. रशियाकडून युक्रेनवर प्रत्येक दिवशी आक्रमकपणे हल्ले करण्यात येत आहेत. त्यामुळेही प्रचितीच्या आईवडिलांना चिंता लागून राहिली आहे.
प्रचिती आणि इतर विद्यार्थ्यांना बंकरमध्येच ठेवण्यात आले आहे. आमची काळजी वाढू नये म्हणून तिला होत असलेला त्रास ती संगत नाहीये. पण तिच्या आवाजाहून कळत की त्यांना आता व्यवस्थित खायला मिळत नाहीये. त्यांच्या अडचणी वाढू लागल्या आहेत, असं प्रचितीची आई पल्लवी आंगणे यांनी सांगितलं. पल्लवी या आता रोज देवा समोर प्रार्थना करत आहेत. आपली मुलगी सुखरूप घरी परत यावी हेच साकडं त्या देवाला घालत आहेत.
प्रचितीचा तो व्हिडीओ काय?
चार दिवसांपूर्वी प्रचितीने एक व्हिडीओ शेअर केला होता. त्यावेळी तिने आम्हाला मायदेशी न्या असं आवाहन भारत सरकारला केलं होतं. आम्हाला बंकर्समध्ये ठेवलंय. भारतीय आणि पाकिस्तानी विद्यार्थी या बंकर्समध्ये आहेत. यूपीचे विद्यार्थीही आमच्यासोबत आहेत. महाराष्ट्रातील इतर विद्यार्थी दुसऱ्या बंकर्समध्ये आहेत. संध्याकाळी 4 वाजता आम्हाला या बंकर्समध्ये आणलं. आम्हाला खायला दिलंय. आम्ही सुरक्षित आहोत. पण भीतीदायक परिस्थिती आहे. ब्लास्टचे आवाज अधूनमधून ऐकायला येत आहेत. कुठेही जाण्यास आम्हाला मज्जाव करण्यात आला आहे. आम्हाला वॉशरुमलाही एकएकट्या पाठवलं जातंय. परिस्थिती खूपच खराब होत चालली आहे. आमची भारताचे पंतप्रधान आणि महाराष्ट्राच्या मुख्यमंत्र्यांना विनंती आहे की, आम्हाला लवकरात लवकर बाहेर काढा. आमची परिस्थिती समजून घ्या, आम्ही खूप घाबरलो आहोत, असं प्रचितीने म्हटलं होतं.
संबंधित बातम्या:
नवीनचा मृतदेह शक्य तितक्या लवकर भारतात आणू, परराष्ट्र मंत्रालयाकडून नवीनच्या कुटुंबीयांचं सांत्वन
