धनुष्यबाण चोरणाऱ्या शिंदे, शाह, आयोगावर मकोका लावा; संजय राऊत यांची मोठी मागणी

आमचा धनुष्यबाण चोरण्यात आलेला आहे. तीन चोरांनी ही चोरी केली आहे. ही संघटीत चोरी आहे. त्यांना मकोका लावा. अमित शाह, एकनाथ शिंदे आणि निवडणूक आयोगाचे आयुक्त राजेश कुमार यांनी धनुष्यबाण चोरला आहे, असा आरोप संजय राऊत यांनी केला आहे. काल सर्वोच्च न्यायालयात ठाकरे गटाची सुनवाणी पूर्ण झाली. या पार्श्वभूमीवर संजय राऊत मीडियाशी संवाद साधत होते.

धनुष्यबाण गोठवण्याचा मागणी तुमच्या वकिलांनी केली. तुम्ही बाळासाहेबांचेच विचार गोठवत आहात, अशी टीका शिंदे गटाकडून होत आहे, याकडे संजय राऊत यांचं लक्ष वेधलं असता त्यांनी शिंदे गटावर जोरदार हल्ला केला. आमचा धनुष्यबाण चोरीला गेला आहे. आपण चोराला पकडतो, तेव्हा मुद्देमाल जप्त करतो. आधी मुद्देमाल जप्त करा. बाळासाहेबांचा विचार आम्हाला सांगू नका. चोवीस तास मोदी आणि शाह यांचे बूट चाटता. त्यात कोणता आला बाळासाहेबांचा विचार? धनुष्यबाणाची तुम्ही चिंता करू नका. आम्ही आहोत, असं सांगतानाच त्यांना निधी मिळत नाही तर अजून एक फूट पाडा. फुटीत फूट पाडा. निकालानंतर ती फूट पडणारच आहे, असं राऊत म्हणाले.

राणे तडजोडीला तयार

नारायण राणे आणि राऊत यांच्यात कोर्टात मानहानीचा खटला सुरू आहे. यावेळी राणे यांच्याकडून तडजोडीचा प्रस्ताव दिला आहे. त्यावरही राऊत यांनी प्रतिक्रिया व्यक्त केली. नारायण राणे यांचे वकील काल कोर्टात उलट तपासणी करणार होते. न्यायामूर्ती म्हणाले, आजच प्रकरण संपवू. वेळ झाला आहे. तुम्ही थांबा. त्यामुळे आम्ही थांबलो. राणेंचे वकील सतीश मानेशिंदे आले. त्यांनी तडजोडीचा मसुदा तयार केला आहे. आम्हाला तडजोड करायची आहे, अशी इच्छा कोर्टासमोर व्यक्त केली. कोर्ट असे प्रस्ताव स्वीकारत असते. कोर्ट म्हणाले, ज्यांनी खटला दाखल केला, ते तयार असतील तर करू. माझ्याकडे पुरावे होते. मी पुराव्यानिशी राणेंचा दावा खोडून काढला. राणे खोटे बोलले हे दाखवलं, असं सांगतानाच राणेंचा प्रस्ताव माझ्याकडे आला नाही. आल्यावर बघू. असं राऊत म्हणाले.

तडजोडीचा प्रस्ताव हा माफी किंवा दिलगिरीचा असतो. त्यांनी काय करावं हा त्यांचा प्रश्न आहे. आम्ही हा खटला शेवटच्या टप्प्यापर्यंत आणला. माझ्या आणि माझ्या पक्षाच्या आत्मसन्मानाची ही लढाई आहे. या प्रकरणात राणेंकडून निवडणूक आयोगावरही भ्रष्टाचाराचा आरोप करण्यात आला. निवडणूक आयोगाला पैसे दिल्याचा आरोप झाला. आता न्यायालयासमोर काय प्रस्ताव येतो यावर सर्व आवलंबून आहे, असं राऊत म्हणाले.

राष्ट्रपतींना पुस्तक भेट

संजय राऊत यांनी राष्ट्रपतींना देवळाचा धर्म आणि धर्माची देवळे हे प्रबोधनकारांचं पुस्तक पाठवलं आहे. त्यावरही त्यांनी भाष्य केलं. राष्ट्रपतींना या पुस्तकाची गरज आहे असं वाटतं. कुणी धार्मिक असणं आवश्यक नाही. धीरेंद्र शास्त्रींनी राष्ट्रपती भवनात जाऊन राष्ट्रीय प्रश्नांवर राष्ट्रपतींशी चर्चा केली. त्यामुळे वाटलं राष्ट्रपतींना प्रबोधनकारांचं पुस्तक पाठवावं. देवळाचा धर्म आणि धर्माची देवळे. मोदींनाही पाठवावे लागेल. जे जे धर्माचं अवडंबर माजवत आहेत, बुवाबाजीचं अवडंबर माजवत आहेत, दानपेट्यांची लूट करत आहेत, त्यांना प्रबोधनकारांचं पुस्तक पाठवतो. या पुस्तकाचा हिंदी आणि इंग्रजीत अनुवाद करण्याचं काम सुरू आहे, असंही राऊत यांनी सांगितलं.