Tv9 मराठी स्पेशल रिपोर्ट : दारुचं नाही तर ‘ड्रग्स’चीही नशा? पुणे पोलिसांना शंका

दारु पिवून भरधाव वेगानं दोघांना चिरडणाऱ्या अल्पवयीन वेदांत अग्रवालची रवानगी बाल सुधारगृहात झालीय. आता एक एक धक्कादायक माहिती समोर आलीय. अपाघाताच्या दिवशी वेदांतनं दारुसह ड्रग्सचंही सेवन केल्याची शंका पोलिसांना आहे, त्या दिशेनंही तपास सुरु झालाय. अडीच कोटींची पॉर्शे कार चालवण्याआधी वेदांत अग्रवाल हा ऑडी कार चालवायचा. 12 वी पास झाल्यामुळं वेदांतनं पबमध्ये 10-12 मित्रांसाठी पार्टीचं नियोजन केलं होतं. कोझी पब मधल्या दारुचं बिल 48 हजार झालं.

आता वेदांतसोबत पार्टी करणाऱ्या मित्रांचीही पुणे पोलिसांकडून चौकशी सुरु झालीय. पोर्शे कारमध्ये तांत्रिक बिघाड असतानाही वडील विशाल अग्रवालने अल्पवयीन मुलाच्या हाती कार दिली. मुलानं कार मागितली तर चालवायला दे, तू बाजूला बस अशी सूचना विशाल अग्रवालनं कार चालकाला दिली होती, अशी माहितीही समोर आलीय .अपघातावेळी वेदांतचा ड्रायव्हर कारमध्येच होता, त्यामुळं त्यालाही पोलिसांनी ताब्यात घेतलं असून चौकशी सुरु आहे. तर अपघाताच्या 5 दिवसांनी पत्रकार परिषद घेवून सुप्रिया सुळेंनी, पोलिसांवर दबावाचा आरोप केलाय. कोणाचा दबाव होता, कोणी फोन केले, हे गृहमंत्री फडणवीसांनी सांगावं, असं सुप्रिया सुळे म्हणाल्यात.

कलम 304 वरुन सुरु असलेला वाद अजूनही कायम आहे..काँग्रेसचे पुण्याचे आमदार रवींद्र धंगेकरांनी दोन्ही FIR ट्विट करुन, पहिल्या FIRमध्ये कलम 304 नाही तर कलम 304 अ हे लावण्यात आलं. गृहमंत्र्यांनी दिशाभूल केल्याचा आरोप केला. त्यावर पुण्याचे भाजपचे नेते मुरलीधर मोहोळांनी, कलम 304 लावण्यात आल्याचं दाखवत रिमांड रिपोर्ट ट्विट केला. मात्र विरोधकांनी पुन्हा FIRवरुन दिशाभूल केल्याचा आरोप केलाय.

19 तारखेला म्हणजे रविवारी पहाटे अडीच वाजता वेदांतनं दारुच्या नशेत अनिश अवधिया आणि अश्विनी कोस्टाला उडवलं त्यानंतर 19 तारखेलाच सकाळी 8 वाजून 26 मिनिटांनी गुन्ह्याची नोंद करण्यात आली. ज्यात कलम 304 अ आहे, कलम 304 नाही आणि डंक अँड ड्राईव्हचं कलम 185 नाही. आता मोहोळांनी बाल न्याय कोर्टात सादर केलेला जो रिमांड रिपोर्ट ट्विट केला. त्यात कलम 304 आणि कलम 185 आहे…मात्र, ही सुद्धा दिशाभूल असल्याचा आरोप धंगेकरांचा आहे. पहिल्या FIRचा क्रमांक आहे, 0306…हाच FIR क्रमांक रिमांड रिपोर्टमध्ये आहे. पण कलम 304 कलम आणि कलम 185 रिमांड रिपोर्टमध्ये दाखवण्यात आली, ती कलमं त्या FIR रिपोर्टमध्येच नाही.

भाजपच्या नितेश राणेंनी सुप्रिया सुळे आतापर्यंत गप्प का? बिल्डर विशाल अग्रवालशी पवार कुटुंबीयांशी संबंध आहेत..त्यामुळं वाचवण्याचा प्रयत्न होतोय का ? असा आरोप नितेश राणेंनी सुप्रिया सुळेंवर केलाय. याआधी अजित पवार गटाचे आमदार सुनील टिंगरेंवर पोलिसांवर दबाव टाकल्याचा आरोप झाला. पण टिंगरेंनी आरोप फेटाळलेत..आता सुप्रिया सुळेंनीही कोणाचा फोन होता असा सवाल करुन फडणवीसांकडे खुलासा करण्याची मागणी केली. तर नितेश राणेंनी सुप्रिया सुळेंवरच पवार कुटुंबाशी विशाल अग्रवालशी काय संबंध आहेत, असा सवाल करुन आरोप केलेत.