Arshdeep Singh Fine: माफी मागीतल्यानंतरही अर्शदीप सिंहला भरावा लागणार दंड, कारण की…

टी20 वर्ल्डकप 2026 स्पर्धेचं जेतेपद भारताने मिळवलं आहे. पण या स्पर्धेतील काही घडामोडी अजूनही प्रभाव टाकत आहेत. या स्पर्धेत अर्शदीप सिंगने जबरदस्त कामगिरी केली होती. टीम इंडियाला जेतेपद मिळवून देण्यात मोलाची भूमिका बजावली होती. पण अंतिम सामन्यात केलेली एक चूक त्याला भोवली आहे. अर्शदीप सिंग आचारसंहितेचं उल्लंघन केल्याप्रकरणी दोषी आढळला आहे. त्याच्या सामना मानधनातून 15 टक्के रक्कम कापली गेली आहे. अर्शदीप सिंगने अंतिम सामन्यात न्यूझीलंडचा फलंदाज डॅरेल मिचेलला रागाच्या भरात चेंडू मारला होता. दोघांमध्ये वादाची ठिणगी पडली होती. त्यानंतर अर्शदीप सिंगला दंड ठोठावण्यात आला होता. त्यामुळे अर्शदीप सिंगला टी20 वर्ल्डकप अंतिम सामन्याचं मानधन पूर्ण मिळणार नाही. त्याच्या सामना फीमधून 45 हजार रूपये कापले जाणार आहेत. टीम इंडियाच्या एका खेळाडूला एका टी20 सामन्यासाठी 3 लाख मिळतात. त्यामुळे सामना फीमधून 15 टक्के कापले गेल्याने 2 लाख 55 हजार रुपये मिळतील.

अर्शदीप-मिचेल यांच्यात वाद

न्यूझीलंडची फलंदाजी सुरू असताना अर्शदीप सिंगकडे संघाचं 11वं षटक सोपवण्यात आलं होतं. या षटकाच्या दुसऱ्या आणि तिसऱ्या चेंडूवर मिचेलने षटकार मारला. त्यामुळे अर्शदीप सिंगचा पारा चढला होता. पाचव्या चेंडूवर मोठा फटका मारण्याचा मिचेलचा प्रयत्न होता. पण चेंडू सरळ अर्शदीपच्या हाती गेला. त्यामुळे रागाच्या भरात अर्शदीपने चेंडू स्टंपच्या दिशेने फेकला. पण हा चेंडू डॅरेल मिचेल लागला. अर्शदीपच्या या कृतीचा डॅरेल मिचेलला राग आला. त्यानंतर तो अर्शदीपच्या दिशेने गेला, पण पंचांनी त्याला अडवलं. सूर्यकुमारनेही डॅरेलची समज काढली. त्यानंतर अर्शदीप सिंगने मिचेलजवळ जाऊन माफी मागितली.

सामना संपल्यानंतर अर्शदीप सिंगने हर्षा भोगले यांच्याशी संवाद साधला. यावेळी त्याने या सामन्यात घडलेल्या प्रकरणाचा उल्लेख केला. त्याने सांगितलं की, तो चेंडू दुसऱ्या बाजूला फेकत होता, पण चेंडू रिव्हर्स स्विंग झाला. सामन्यानंतर अर्शदीप सिंग आणि डॅरेल मिचेल एकत्र दिसले. यावेळी त्याने पुन्हा एकदा माफी मागितली. पण आयसीसीच्या मते हे आचारसंहितेचं उल्लंघन आहे. त्यामुळे दंड ठोठावला आहे. तसं पाहिलं तर बीसीसीआयकडून अर्शदीप सिंगला बक्षिसाच्या रूपाने मोठी रक्कम मिळाली आहे. त्यामुळे 15 टक्के रक्कम कापली तरी फरक पडणार नाही.