‘रिकामं भांडं जास्त आवाज करतं’, ठाकरे सेनेच्या शिलेदाराचा नितेश राणे यांना झणझणीत टोला, म्हणाले…

दिशा सालियन प्रकरणावरून उद्धव सेना आणि मंत्री नितेश राणे आमने-सामने आले आहेत. खासदार संजय राऊत यांनी या प्रकरणाला हवा देण्याचे आणि फंडिंग पुरवण्याचा राणे कुटुंबियांवर आरोप केला आहे. गेल्या काही दिवसांपासून हा शा‍ब्दिक वाद झडत आहे. त्यातच उद्धव सेनेचे नेते अखिल चित्रे यांनी आता मंत्री नितेश राणे यांच्याविरोधात मोर्चा उघडला आहे. मच्छिमारांच्या नुकसानी भरपाईवरून त्यांनी मंत्रिमहोदयांना घेरण्याचा प्रयत्न केला आहे. राणे हे त्यांच्या खात्याचे काम सोडून इतर मुद्दात गुरफटल्याचा आरोप चित्रे यांनी केला आहे.

ठाकरेंच्या नावाने प्रसिद्धी मिळवण्याचा स्वस्त प्रकार

अखिल चित्रे यांनी मंत्री नितेश राणे यांच्यावर जहरी टीका केली आहे. ठाकरेंच्या नावाने प्रसिद्धी मिळवण्याचा हा स्वस्त प्रकार आता बंद करा. तुम्ही मत्स्यव्यवसाय आणि बंदरे मंत्री आहात, मग तुमच्या खात्याचं काम बोला. राज्यातील शेतकरी आणि मच्छीमार संकटात आहेत आणि तुम्ही मात्र बांगलादेशी, नेपाळी, पाकिस्तानी करत राजकीय पोपटपंची करण्यात व्यस्त आहात. तिथेही त्यांचं ज्ञान कमीच आहे. मच्छीमारांचं नुकसान किती? किती पंचनामे झाले? किती मदत दिली? किती जणांच्या खात्यात पैसे जमा झाले? “दुप्पट मदत” म्हणत असाल तर आकडे जाहीर करा आणि हिशोब द्या, असे चित्रे यांनी सुनावले आहे.

रिकामं भांडं जास्त वाजतं

इंग्रजीत एक म्हण आहे, “Empty vessels make the most noise.” मराठीत सांगायचं तर, “रिकामं भांडं जास्त आवाज करतं.” अशी खरमरीत टीकाही चित्रे यांनी राणे यांच्यावर केली. ठाकरेंच्या नावाचा जप करून प्रसिद्धी मिळवण्यापेक्षा हिम्मत असेल तर स्वत:च्या कामाचा आवाज महाराष्ट्राला ऐकवा, असा सल्लाही चित्रे द्यायला विसरले नाहीत.

ठाकरेंच्या नावाने प्रसिद्धी मिळवण्याचा हा स्वस्त प्रकार आता बंद करा! तुम्ही मत्स्यव्यवसाय आणि बंदरे मंत्री आहात,@NiteshNRane मग तुमच्या खात्याचं काम बोला!

राज्यातील शेतकरी आणि मच्छीमार संकटात आहेत आणि तुम्ही मात्र बांगलादेशी, नेपाळी, पाकिस्तानी करत राजकीय पोपटपंची करण्यात व्यस्त…

— Akhil Chitre अखिल चित्रे (@akhil1485) September 28, 2026

नितेश राणे यांचे मच्छिमारांसाठी घोषणा

१. राज्याचे मत्स्यव्यवसाय आणि बंदेर विकास मंत्री नितेश राणे यांनी मच्छिमारांच्या नुकसान भरपाई आणि सवलतीबाबत काही घोषणा केल्या होत्या.

२. त्यानुसार राज्यातील दुष्काळग्रस्त भागांमधील मच्छिमार, मत्स्यव्यवसाय करणाऱ्यांना शासनाकडून विशेष मदत दिली जाणार आहे.

३. धरण, तलाव क्षेत्रात पाणी टंचाईमुळे झालेल्या नुकसानीचे पंचनामे करून प्रभावित मच्छिमारांना मदत करण्याचे निर्देश देण्यात आले आहे.

४. माशांच्या प्रजनन काळात मासेमारी पूर्णपणे बंद असते. या काळात मच्छिमारांचे नुकसान होते. त्यांच्यासाठी आंध्र प्रदेश राज्याच्या धरतीवर राज्यातील शेतकऱ्यांना 20 ते 22 हजारांची मदत देण्याचे संकेत देण्यात आले आहेत.

५. मच्छिमार व्यवसायाला राज्य सरकारने अगोदरच शेतीचा दर्जा दिला आहे. शेतकऱ्यांना ज्याप्रमाणे कर्जमाफी आणि विविध योजनांचे लाभ दिले जातात. त्याच धरतीवर मच्छिमारांनाही कर्जमाफी आणि विशेष सवलती देण्याची घोषणा मंत्री नितेश राणे यांनी केली आहे. पण चित्रे यांनी मदतीच्या आकडेवारीसह माहिती देण्याचे आवाहन राणे यांना केले आहे.