Water Supply : बोरिवली आणि दहिसरमधील काही परिसरांमध्ये दोन दिवस पाणीपुरवठा बंद राहणार

मुंबई : बृहन्‍मुंबई महानगरपालिकेतर्फे बोरिवली (पश्चिम) परिसरातील ‘आर मध्य’ विभाग परिसरातील ऑरा हॉटेल समोरील लिंक रोडच्या पूर्वेकडील बाजूस 1500 मिलीमीटर व्यासाची जलवाहिनी (वल्लभ नगर आउटलेट) वळवण्याचे काम गुरुवार 5 मे 2022 रोजी रात्री 11.55 वाजल्यापासून शुक्रवार 6 मे 2022 रोजी रात्री 11.55 वाजेपर्यंत हाती घेण्यात येणार आहे. सदर कालावधीत म्हणजेच गुरुवार 5 मे 2022 रोजी रात्री 11.55 वाजल्यापासून शुक्रवार 6 मे 2022 रोजी रात्री 11.55 वाजेपर्यंत ‘आर मध्य’ व ‘आर उत्तर’ विभागातील काही परिसरांमध्ये पाणीपुरवठा पूर्णपणे बंद राहील. संबंधित परिसरातील नागरिकांना आवाहन करण्यात येते की, उपरोक्त नमूद कालावधीत पाणी कपातीपूर्वी अगोदरच्या दिवशी पाण्याचा आवश्यक साठा करुन ठेवावा. तसेच, कपातीच्या कालावधीत काटकसरीने पाणी वापरुन सहकार्य करावे, अशी विनंती बृहन्मुंबई महानगरपालिका प्रशासनाच्या वतीने करण्यात येत आहे. (Water supply will be cut off for two days in some areas of Borivali and Dahisar)

आर मध्य विभागात या परिसरात पाणीपुरवठा बंद

‘आर मध्य’ विभागात चारकोप, गोराई, एक्सर, शिंपोली, वझिरा व संपूर्ण बोरिवली (पश्चिम) विभाग – (सायंकाळी 7.10 ते रात्रौ 9.40 आणि सकाळी 11.50 ते दुपारी 1.50 ही नियमित पाणीपुरवठ्याची वेळ. मात्र, दिनांक 6 मे 2022 रोजी कामादरम्यान पाणीपुरवठा बंद राहील).

आर उत्तर विभागात या परिसरात पाणीपुरवठा बंद

‘आर उत्तर’ विभागात एलआयसी वसाहत, एक्सर गाव, दहिसर गाव, कांदरपाडा, लिंक रोड व संपूर्ण दहिसर (पश्चिम) विभाग – (रात्री 9.40 ते रात्री 11.55 ही नियमित पाणीपुरवठ्याची वेळ. मात्र, 6 मे 2022 रोजी कामादरम्यान पाणीपुरवठा बंद राहील). (Water supply will be cut off for two days in some areas of Borivali and Dahisar)