महाराष्ट्राच्या औद्योगिक शहराची नगरपरिषद दत्तक, नितीन गडकरींचं स्तुत्य पाऊल

नागपूर : भाजपचे दिग्गज नेते आणि केंद्रीय मंत्री नितीन गडकरी (Nitin Gadkari) यांनी महाराष्ट्रातील औद्योगिक शहर बुटीबोरीची नगरपरिषद (Butibori Nagar Parishad) दत्तक घेतली. गडकरींना आतापर्यंत गावं दत्तक घेतली आहेत, मात्र नगरपरिषद दत्तक घेण्याची ही पहिलीच वेळ आहे. नागपूर शेजारी (Nagpur) असलेल्या बुटीबोरीची औद्योगिक शहर म्हणून ओळख आहे. (BJP Leader Nitin Gadkari adopts Butibori Nagar Parishad near Nagpur)

नागपूर शेजारील औद्योगिक शहर

बुटीबोरी नगरपरिषद दत्तक घेण्याचा निर्णय केंद्रीय मंत्री नितीन गडकरी यांनी आज जाहीर केला. बुटीबोरी शहराचा सर्वांगीण विकास आणि हरित शहर करण्यासाठी प्रयत्न करणार असल्याचं नितीन गडकरी यांनी यावेळी सांगितलं. नागपूर शेजारी असलेल्या बुटीबोरीची औद्योगिक शहर म्हणून सर्वत्र ख्याती आहे. गडकरींनी बुटीबोरी उड्डाणपुलाचे आजच लोकार्पण केले. या पुलामुळे वर्धा, हैद्राबाद आणि चंद्रपूरकडे जाणारी वाहतूक सुरळीत आणि जलद होणार आहे.

नगराध्यक्षांकडून आभार

यापूर्वी नितीन गडकरी यांनी गावं दत्तक घेतली आहेत, पण पहिल्यांदाच त्यांनी नगरपरिषद दत्तक घेण्याचा निर्णय घेतला. ‘बुटीबोरीच्या विकासासाठी आपण कटीबद्ध आहोत’ अशी ग्वाही गडकरींनी यावेळी बुटीबोरीवासियांना दिली. बुटीबोरी नगरपरिषद दत्तक घेतल्याबद्दल नगराध्यक्ष बबलू गौतम यांनी नितीन गडकरी यांचे आभार व्यक्त केले.

बुटीबोरी उड्डाणपुलाचे गडकरींच्या हस्ते लोकार्पण

बुटीबोरी, नागपूर उड्डाणपुलाच्या लोकार्पण कार्यक्रमातून लाईव्ह https://t.co/7g3RdlqSH1

— Nitin Gadkari (@nitin_gadkari) June 17, 2021

लोकसभेत नागपूरचं नेतृत्व

नितीन गडकरी सध्या केंद्रीय कॅबिनेटमध्ये रस्ते वाहतूक आणि महामार्ग मंत्री, तसेच सूक्ष्म, लघु आणि मध्यम उद्योग मंत्री म्हणून धुरा सांभाळत आहेत. संसदेत ते नागपूर लोकसभा मतदारसंघाचं नेतृत्व करतात. बुटीबोरी नगरपरिषद ही त्यांच्या नागपूर लोकसभा मतदारसंघाच्या अंतर्गत येते.

संबंधित बातम्या :

Youtube चॅनलमधून गडकरी महिन्याला किती कमावतात? पहिल्यांदाचा जगजाहीर खुलासा, ऐका त्यांच्याकडूनच!

वेल डन! फडणवीसांचा एक निर्णय, जो प्रत्येक आमदार, खासदार, लोकप्रतिनिधीनं कम्पलसरी राबवावा!

(BJP Leader Nitin Gadkari adopts Butibori Nagar Parishad near Nagpur)