Chandrapur: चंद्रपूर महापालिकेत भाजपच्या सत्तेसाठी काँग्रेस नेत्याच्या घरी पहिली बैठक; सुधीर मुनगंटीवारांचा सर्वात मोठा गौप्यस्फोट, राजकारणात खळबळ

Sudhir Munganttiwar on Rahul Pugliya: चंद्रपूर महानगरपालिकेत भाजपमध्ये जसे दोन गट आहेत. तसेच काँग्रेसमध्ये पण दुही आहे. ती जगजाहीर आहे. महापालिकेत सर्वाधिक 27 जागा जिंकत काँग्रेस सर्वात मोठा पक्ष ठरला. पण राजकीय सारीपाटावर काँग्रेसला सत्तेचं राजकारण जमवता आलं नाही. काँग्रेसचे दोन्ही गट एकमेकांवर कुरघोडी करण्यात गुंतलेले असतानाच भाजपने डाव साधला. उद्धव सेनेला हाताशी धरत काँग्रेसचा फियास्को केला. भाजपच्या संगीता खांडेकर महापौर आणि उद्धव ठाकरे शिवसेनेचे प्रशांत दानव हे उपमहापौर ठरले. पण या खेळात काँग्रेसच्या एका नेत्याची मोठी भूमिका होती असा गौप्यस्फोट भाजप नेते सुधीर मुनगंटीवार यांनी केला आहे.

काँग्रेसची सत्ता नाही

काँग्रेसने महानगरापालिकेत 27 जागा जिंकल्या. पण विजय वडेट्टीवार आणि खासदार प्रतिभा धानोरकर यांच्या समर्थक नगरसेवकांमध्ये अटीतटीचा सामना दिसला. हा वाद पार दिल्लीपर्यंत गेला. संख्याबळ अधिक असल्याने आणि उद्धव सेनेशी चर्चा सुरू असल्याने, जनविकास सेनेशी चर्चा होत असल्याने काँग्रेसचा महापौर होणार असं मानल्या जात होतं. त्यादृष्टीनं बोलणी, चर्चा सुद्धा सुरू होती. तर दुसरीकडं भाजपनं ऐनेवळी गेम पालटवला. काँग्रेसच्या दुहीचा फायदा घेतला. उद्धव सेना इथं किंगमेकरच्या भूमिकेत होती. उद्धव सेनेला सव्वा वर्षांचं महापौर पदाची ऑफर देण्यात आली आणि गेम पालटला. तर मतदानावेळी वंचितचे दोन नगरसेवक गैरहजर राहिले. तर MIM नगरसेवक तटस्थ राहिला. चुरशीच्या निवडणुकीत भाजपने ठाकरे सेनेच्या पाठिंब्याने महापौर पदाला गवसणी घातली. काँग्रेसच्या तोंडातील घास भाजपने हिसकावला.

राहुल पुगलिया यांच्या घरी बैठक

भाजपच्या या यशस्वी खेळीमागे भाजपचे ज्येष्ठ नेते सुधीर मुनगंटीवार आणि आमदार किशोर जोरगेवार हे मानले जातात. या राजकीय खेळीविषयी सुधीरभाऊ नेहमीप्रमाणे मनमोकळे बोलले. काँग्रेस आणि भाजपला दोघांनाही बहुमत नव्हतं. त्यामुळं संधीचं आम्ही सोनं केलं असे मुनगंटीवार म्हणाले. नंदू धागरकर, प्रशांत नानव यांचे आभार मानतानाच त्यांनी विशेष करून काँग्रेसचे नेते राहुल पुगलिया यांचे जाहीर आभार मानले.

राहुल पुगलिया हे जरी काँग्रेस पक्षाचे असले तरी त्यांनी आम्हाला मदत केली. त्यांनी पहिली बैठक त्यांच्याच घरी घडवून आणली होती असा गौप्यस्फोट सुधीरभाऊंनी केला. त्यातून एक चांगलं वातावरण चंद्रपूरमध्ये तयार झालं. आमचं कुटुंब हे इतक्या वर्षांपासून जरी काँग्रेसचं असलं तरी जो विकास आम्हाला चंद्रपूरमध्ये हवा आहे तो तुम्हीच करू शकाल हा विश्वास आम्हाला आहे. आमचं हृदय काँग्रेसचं आहे. पण महापौर पदासाठी आम्ही तुम्हाला मदत करू असं पुगलिया यांनी सांगितल्याचा दावा सुधीरभाऊंनी केला.