महाराष्ट्रात मोठ्या घडामोडी? प्रकाश आंबेडकर आणि अभिजीत दीपके एकत्र लढणार? आंबेडकर काय म्हणाले?

कॉकरोच जनता पार्टीचे संस्थापक अभिजीत दीपके यांना देशभर प्रचंड प्रतिसाद मिळत आहे. महाराष्ट्रातही दीपकेंना तरुणांचा मोठा पाठिंबा मिळत आहे. मात्र, दीपके यांनी राजकारणात उतरण्याचा अद्याप कोणताही निर्णय घेतलेला नाही. एक दबाव गट म्हणून काम करण्यावर त्यांनी भर दिला आहे. तसं त्यांनी वारंवार बोलूनही दाखवलं आहे. मात्र, अभिजीत दीपके आणि वंचित बहुजन आघाडीचे नेते प्रकाश आंबेडकर दोघेही एकत्र येण्याची जोरदार चर्चा सुरू आहे. त्यावर अखेर प्रकाश आंबेडकर यांनीच भाष्य करून सर्व चर्चांना पूर्णविराम दिला आहे.

प्रकाश आंबेडकर हे नागपुरात होते. यावेळी मीडियाने त्यांना आगामी निवडणुकांमध्ये कॉकरोच जनता पार्टी आणि वंचित बहुजन आघाडी एकत्र येणार का? असा सवाल केला. त्यावर आंबेडकर यांनी थेटच भूमिका मांडली. आम्ही आता असणाऱ्या राजकीय पक्षासोबत जाऊ. ज्यांनी अजून राजकीय भूमिका स्वीकारली नाही त्यांच्यासोबत का जाऊ? असा सवाल करत प्रकाश आंबेडकर यांनी सर्व चर्चांना पूर्णविराम दिला आहे.

भारत नव्हे, भाजप अमेरिकेवर अवलंबून

अमेरिकेकडून लावल्या जात असलेल्या टॅरिफवरही त्यांनी प्रतिक्रिया व्यक्त केली. माझ्यासारखा पंतप्रधान असता तर अमेरिकेला 100 टक्के टॅरिफ नव्हे तर २०० टक्के टॅरिफ लाव म्हणाला असता. कारण भारत अमेरिकेवर अवलंबून नाही. तर संघ आणि भाजप अमेरिकेवर अवलंबून आहेत. 56 इंचाची छाती सत्तेत बसली नाही, तर 16 इंचाची छाती सत्तेत बसली आहे. त्यांच्यात दम नाही, असं आंबेडकर म्हणाले. पंतप्रधानांनी ब्रिक्समध्ये नेमकं काय निर्णय झाले हे देशाला सांगावेत. चीन संदर्भात आम्ही विषय जनतेसमोर आणला आहे. ब्रिक्समध्ये यावर चर्चा झाली नाही, असंही त्यांनी सांगितलं.

सरकारच बदलावं लागेल

आदिवासी विद्यार्थ्यांच्या आंदोलनावरही त्यांनी प्रतिक्रिया व्यक्त केली. डीबीटी धोरण फडणवीस सरकारने आणलं. विद्यार्थ्यांनी अनेकदा बँकेमार्फत दिली जाणारी रक्कम आम्हाला सांभाळता येत नाही असे फडणवीस यांना सांगितलं. मात्र फडणवीस यांनी विद्यार्थ्यांचं न ऐकता स्वतःचंच खरं असल्याचं सांगितलं. त्यामुळे आता सरकारच बदलण्याची वेळ आली आहे, असंही ते म्हणाले.