मालेगाव महापालिकेत नमाज पठण? थेट व्हिडीओ शेअर करून किरीट सोमय्यांची मोठी मागणी!

Malegaon Namaz Video : गेल्या काही दिवसांपासून मालेगाव महानगरपालिकेचे कार्यालय वेगवेगळ्या कारणांमुळे चर्चेच्या केंद्रस्थानी आलेले आहे. काही दिवसांपूर्वी याच महापालिका कार्यालयात उपमहापौर शान ए हिंद यांनी त्यांच्या दालनात टिपू सुलतान यांचा फोटो लावला होता. हा फोटो नंतर सोशल मीडियावर व्हायरल झाल्यानंतर चांगलाच वाद पेटला. नंतर हा फोटो उपमहापौर यांच्या दालनातून हटवण्यात आला. या प्रकरणाची राज्यभरात चर्चा झाली होती. आता असे असतानाच या महापालिकेच्या एका कार्यालयात थेट नमाज पठण केल्याचा दावा केला जातोय. तसा एक व्हिडीओ समोर आला आहे. भाजपाचे नेते किरीट सोमय्या यांनी त्यांच्या समाजमाध्यम खात्यावर हा व्हिडीओ पोस्ट केला आहे. त्यांनी थेट मुख्यमंत्री देवेंद्र फडणवीस यांच्याकडे या कथित घटनेविरोधात कारवाई करावी, अशी मागणी केली आहे.

नेमका दावा काय?

किरीट सोमय्या यांनी सोशल मीडियावर केलेल्या दाव्यानुसार काही शासकीय कर्मचाऱ्यांनी मालेगाव महानगरपालिका कार्यालयात नमाज पठण केले आहे. विशेष म्हणजे तेथील अधिकाऱ्यांनीदेखील याची पुष्टी केल्याचा दावा सोमय्या यांनी केला आहे. यासह त्यांनी मुख्यमंत्री देवेंद्र फडणवीस यांनी या प्रकरणाची चौकशी करावी अशी मागणी करून योग्य ती कारवाई करण्याची विनंती केली आहे. संबंधित लोकांविरोधात गुन्हा दाखल करावा तसेच शासकीय कर्मचाऱ्यांना निलंबित करावे अशी मागणीही त्यांनी केली आहे.

आतापर्यंत नेमकी काय माहिती समोर आली?

दरम्यान, हा कथित व्हिडीओ मालेगाव मनपाच्या विद्युत विभागाच्या कार्यालयातील असल्याचे बोलले जात आहे. मालेगाव शहरातील विद्युत विभागाच्या कार्यालयात वारंवार खंडित होणाऱ्या विद्युत पुरवठा संदर्भात तक्रार करण्यात आली होती. परंतु वारंवार तक्रार करूनही कारवाई केली जात नसल्याच्या निषेधार्थ नमाज पठण करण्यात आल्याचे सांगण्यात येत आहे.

देवेंद्र फडणवीस नेमका कोणता निर्णय घेणार?

दरम्यान, आता किरीट सोमय्या यांनी हा मुद्दा लावून धरल्याने मुख्यमंत्री देवेंद्र फडणवीस नेमका कोणता निर्णय घेणार का? सोमय्या यांच्या मागणीनुसार तेथील संंबंधित शासकीय कर्मचाऱ्यांचे निलंबन होणार का? मालेगाव महापालिकेचे प्रशासन सोमय्या यांच्या दाव्यावर नेमका काय निर्णय देणार? हे पाहणे महत्त्वाचे ठरणार आहे.