नाशिककरांना दिलासा; 4 वर्षांपूर्वी केलेली अव्वाच्या सव्वा करवाढ निवडणुकीच्या तोंडावर मागे!
नाशिक महापालिकेची निवडणूक विहित वेळेच्या आत होत नसल्याने अखेर नगरविकास विभागाने प्रशासकाची नियुक्ती केलीय. त्यानुसार येणाऱ्या 14 मार्चपासून प्रशासक म्हणून महापालिका आयुक्त कैलास जाधव हे कामकाज पाहणार आहेत.
नाशिकः नाशिककरांना (Nashik) दिलासा देणारी एक अतिशय महत्त्वाची बातमी. अखेर महापालिका (Municipal Corporation) निवडणुकीच्या (Election) तोंडावर सत्ताधारी भाजपने केलेली अव्वाच्या सव्वा करवाढ चार वर्षांनंतर का होईना मागे घेतली आहे. तत्कालीन आयुक्त तुकाराम मुंढे यांच्या काळात ही करवाढ लागू करण्यात आली होती. त्यानुसार एक एप्रिल 2018 नंतरच्या मालमत्तांना अव्वाच्या सव्वा घरपट्टी लागू करण्यात आली होती. अखेर हा ठराव बेकायदेशीर ठरवत त्याची अंमलबजावणी करू नये, असे आदेश महापौर सतीश कुलककर्णी यांनी आपल्या शेवटच्या महासभेत दिले. त्यामुळे त्यांनी आपल्या राजकीय निवृत्तीचा शेवटही गोड केला. होय, महापालिकेत जेष्ठ नगरसेवक आणि विद्यमान महापौर असणाऱ्या सतीश कुलकर्णी यांनी राजकीय निवृत्ती स्वीकारत यापुढे महापालिका निवडणूक लढवणार नसल्याची घोषणा केलीय. सलग पाच वेळा नगरसेवक, उपमहापौर आणि महापौर राहण्याचा विक्रम त्यांच्या नावावर आहे. आपल्या शेवटच्या भाषणातही सतीश कुलकर्णी भावनिक झालेले दिसले.
चुका केल्या दुरुस्त
नाशिक महापालिका निवडणूक तोंडावर आली आहे. सध्या ओबीसी आरक्षणामुळे राज्य सरकारने तीन महिने निवडणुका पुढे ढकलण्याची तयारी सुरू केलीय. मात्र, आज ना उद्या ही रणधुमाळी सुरू होणार आहे. हे ध्यानात घेता सत्ताधारी भाजपने यावेळी अनेक चुकांची दुरुस्ती केली. खरे तर यापू्र्वी महापालिका हद्दीमध्ये कारखाने, औद्योगिक वसाहती कायम रहाव्या म्हणून कर कमी ठेवला होता. मात्र, तुकाराम मुंढे यांच्या काळात हा कर वाढवण्यात आला. याविरोधात नगरसेवक आणि नागरिकांचाही अंसतोष होता. ही करवाढ अखेर मागे घेण्यात आली.
शिवरायांचा पुतळा साकारणार
नाशिक महापालिकेमध्ये शिवरायांचा ब्रांझ धातूचा पुतळा उभारण्यात येणार आहे. यासंबंधीचे पत्र जगदीश पाटील यांनी दिले होते. महापौरांनी या पुतळा उभारणीस मंजुरी दिलीय. पुणे महापालिकेतही शिवरायांचा पुतळा आहे. त्याच धर्तीवर नाशिक महापालिकेत पुतळा उभारण्यात येणार असल्याचे समजते. महापालिकेच्या सहा विभागात प्रत्येक एक तक्रार निवारण केंद्र, सिडकोत अग्निशमन केंद्र, भारतनगरमध्ये घरकुलाची उभारणी असे निर्णयही यावेळी घेण्यात आले.
महापालिकेवर प्रशासक
नाशिक महापालिकेची निवडणूक विहित वेळेच्या आत होत नसल्याने अखेर नगरविकास विभागाने प्रशासकाची नियुक्ती केलीय. त्यानुसार येणाऱ्या 14 मार्चपासून प्रशासक म्हणून महापालिका आयुक्त कैलास जाधव हे कामकाज पाहणार आहेत. विद्यमान महापौर आणि उपमहापौरांची मुदत येत्या 15 मार्चला संपतेय. त्यापार्श्वभूमीवर हा निर्णय घेण्यात आलाय.
इतर बातम्याः
नाशिक – दिंडोरी सिटी बस सुरू; गामीण भागात वाढवला विस्तार, मार्ग काय राहणार?
मालेगाव महापालिकेचे प्रताप; पोलीस मैदानाच्या सरकारी जागेची इदगाह ट्रस्टला खिरापत
