मोठी बातमी! NEET पेपरफुटीचं गुजरात कनेक्शन? रोहित पवार यांचा आरोपांचा धुरळा

UG-NEET 2026 परीक्षेबाबत देशभरात वादंग उठले आहे. कॉक्रोच जनता पार्टीच्या आंदोलनानंतर धर्मेंद्र प्रधान यांची विकेट पडली. केंद्रीय शिक्षण मंत्री बदलला. पण आरोपांची राळ सुरूच आहे. नीटची फेर परीक्षा घेण्यात आली. त्याविषयी शरदचंद्र पवार राष्ट्रवादीचे आमदार रोहित पवार यांनी मोठा बॉम्ब टाकला आहे. त्यांच्या ताज्या आरोपांनी एकच खळबळ उडवून दिली आहे. नीट पेपर लीक पुनर्परिक्षेवरही त्यांनी प्रश्नचिन्ह उपस्थित केले आहे. त्यांनी या पेपरफुटीचं गुजरात कनेक्शन समोर आणले आहे. त्यांच्या आरोपांनी एकच खळबळ उडाली आहे.

ट्विटरवरून सरकारवर हल्लाबोल

आमदार रोहित पवार यांनी सोशल मीडिया प्लॅटफॉर्म एक्सवरून एक खळबळजनक ट्विट केले आहे. त्यात युजी नीटच्या फेर परीक्षेवरही मोठा आक्षेप घेण्यात आला आहे. फेरपरीक्षेचा पेपरही तीन दिवस अगोदरच फुटला आणि त्याचे गुजरात कनेक्शन समोर येत असल्याचा आरोप पवार यांनी केला आहे.

“NEET पेपर लीक झाल्यानंतर जी नवीन फेरपरीक्षा घेण्यात आली त्या परीक्षेचा पेपर देखील ३ दिवस आधीच गुजरातमधून फुटल्याच्या बातम्या समोर येत आहेत. हे सत्य असेल तर खूप अवघड आहे. तपास यंत्रणानी यासंदर्भात त्वरित खुलासा करावा आणि पेपर फुटला असेल तर कुठल्याही दबावाला बळी न पडता यामधील रॅकेट उघडकीस आणावं, ही विनंती. या पेपरफुटीसंदर्भात पुढं आलेले स्किन शॉट, मेल, संभाषण हे सगळं सोबत दिलेल्या लिंकवर गेल्यास पहावयास मिळेल.” असे ट्वीट आमदार रोहित पवार यांनी केले आहे. त्यांच्या या आरोपांनी एकच खळबळ उडाली आहे.

#NEET पेपर लीक झाल्यानंतर जी नवीन फेरपरीक्षा घेण्यात आली त्या परीक्षेचा पेपर देखील ३ दिवस आधीच गुजरातमधून फुटल्याच्या बातम्या समोर येत आहेत. हे सत्य असेल तर खूप अवघड आहे..! तपास यंत्रणानी यासंदर्भात त्वरित खुलासा करावा आणि पेपर फुटला असेल तर कुठल्याही दबावाला बळी न पडता यामधील… pic.twitter.com/qFt1NPgsyQ

— Rohit Pawar (@RRPSpeaks) July 29, 2026

कागदपत्रे, ई-मेलचा पुरावा

आमदार रोहित पवार यांनी आरोपाच्या पुष्ट्यर्थ काही कागदपत्रे आणि एक ईमेल ट्विट केला आहे. त्यांनी या संपूर्ण प्रकरणाची चौकशी करण्याची मागणी केली आहे. त्यांनी याविषयीचे स्क्रीन शॉट , मेल, संभाषण या सगळ्यांची लिंक देखील त्यांनी ट्विट केली आहे. जर नीटची फेरपरीक्षेचा पेपर अगोदरच गुजरातमध्ये फुटल्याचे खरे असेल तर विद्यार्थ्यांच्या भवितव्याच्या दृष्टीने ही अत्यंत चिंताजनक आणि गंभीर बाब असल्याचेही पवार यांनी पोस्टमध्ये म्हटले आहे.

संसदेसमोर अँटी पेपर लीक कायदातील सुधारणांवर चर्चा सुरू आहे. पण त्यात दुसरेच मुद्दे उपस्थित होत असल्याने संसदेचे कामकाज वारंवार तहकूब होत आहे. त्यातच आता नीटच्या फेरपरीक्षेचा पेपरही फुटल्याचा दावा खरा असेल तर विरोधकांना सरकारविरोधात मोठे कोलीत मिळणार आहे. दरम्यान या नवीन दाव्यामुळे पालक आणि विद्यार्थ्यांच्या जीवाला घोर लागला आहे.