Sangli Bogus Fertilizer : सांगलीत 7 लाख 78 हजाराचा बोगस रासायनिक खताचा साठा जप्त

सांगली : कृषी विभागाच्या गुण नियंत्रण पथकाने पोलासांसमवेत सांगलीच्या तासगाव तालुक्यातील मणेराजुरी येथील मळ्यात छापा (Raid) टाकून तब्बल 7 लाख 78 हजाराचा बोगस रासायनिक खता (Bogus Chemical Fertilizer)चा साठा जप्त (Seized) केला आहे. गुजरातमधील नॅशनल फर्टिलायझरच्या नावाने या खताचे पँकिंग करण्यात येत होते. खत निर्मिती, विक्री याचा परवाना नसताना साठा आणि पॅकिंग करण्यात येत असल्याचे दिसून आले. या ठिकाणी 36.90 टन खत बनावट असल्याच्या संशयावरून जप्त करण्यात आले. याची बाजारातील किंमत 7 लाख 38 हजार रुपये आहे. याप्रकरणी दोघांविरोधात तासगाव पोलीस ठाण्यात फिर्याद दाखल करण्यात आली आहे.

दोघांविरोधात फिर्याद दाखल

गुण नियंत्रक पथक आणि स्थानिक गुन्हे अन्वेषण विभागाचे पोलीस निरीक्षक अजय सिंदकर यांच्या मार्गदर्शनाखालील पोलीस पथक यांनी मणेराजुरी येथील एका पोल्ट्री शेडवर छापा टाकला. यावेळी ट्रकमधून खताची पोती उतरविण्यात येत होती. शेडमध्ये विना लेबल रासायनिक मिश्र खत, गोळी व दाणेदार खत यांची 50 किलो वजनाची पोती आढळली. खत निर्मिती, विक्री याचा परवाना नसतानाही खताचा साठा आणि पॅकिंग करण्यात येत होते. या प्रकरणी खताचा व्यवसाय करणारे मुजाहिद मुजावर (25) आणि रमजान मन्सूर मुजावर (27) दोघे रा. मणेराजुरी या दोघांविरुध्द तासगाव पोलीस ठाण्यात गुण नियंत्रक सुरेंद्र पाटील यांनी फिर्याद दिली आहे.

अमरावतीतही खरिपाच्या तोंडावर युरियाची तस्करी

मान्सूनचे आगमन झाले असून खरीप तोंडावर असल्याने शेतकरी आता शेतीकामाला लागला आहे. खरिपाच्या तोंडावर युरिया खतांची तस्करी होत असल्याचं उघडकीस आलं आहे. अमरावतीतून मध्य प्रदेशात युरियाची तस्करी होत आहे. कृषी विभाग आणि पोलिसांच्या मदतीने हा सगळा प्रकार उघडकीस आला आहे. अमरावतीच्या पांढरघाटी येथून मध्य प्रदेशात युरियाची तस्करी होत असल्याची माहिती प्रशासनाला होती. त्यानुसार सापळा रचून ही कारवाई करण्यात आली आहे. यात ट्रकसह 240 युरियाच्या बॅग जप्त करण्यात आल्यात. या प्रकरणी ट्रक चालकाला पोलिसांनी ताब्यात घेतले आहे. पुढील कारवाई पोलीस आणि कृषी विभागाकडून केली जात आहे. (7 lakh 78 thousand bogus chemical fertilizer stocks seized in Sangli)