Parbhani ZP Election Result 2026 : भाजपच्या बड्या नेत्यावर मोठी नामुष्की, जिल्हा परिषदेत कुटुंबातील 5 पैकी 4 जण हरले

Parbhani ZP Election Result 2026 : परभणी जिल्हा परिषद निवडणुकीत मतदारांनी भाजपच्या ज्येष्ठ नेत्याची आणि माजी मंत्र्यांची घराणेशाहीला नाकारलं आहे. परभणीच्या लोहगाव जिल्हा परिषद सर्कलमधून भाजप नेते सुरेश वरपूडकर यांच्या कुटुंबातील 5 पैकी 4 जणांचा पराभव झाला आहे. तर फक्त पुतण्या अजित वरपूडकर याने कुटुंबाची लाज राखत विजय मिळवला आहे. अजितला काँग्रेसकडून उमेदवारी मिळाली होती. वरपूडकर कुटुंबातील या एकमेव सदस्याचा विजय झाला आहे. जिल्हा परिषद निवडणुकीत सुरेश वरपूडकर यांनी त्यांच्यात कुटुंबातील एक-दोन नव्हे तर पाच जणांना वेगवेगळ्या पक्षातून उमेदवारी दिली होती. मुलगा समशेर वरपूडकरला शिंगणापूर गटातून, सून प्रेरणाला दैठणा गटातून, मुलगी सोनल देशमुख ही शिवसेना ठाकरे गटातून आणि पुतणे ऐश्वर्या हे जांब गटातून निवडणुकीला उभे होते. दुसरा पुतण्या अजित वरपूडकर यांनी काँग्रेसकडून लोहगाव गटातून निवडणूक लढवली होती. कुटुंबातून फक्त त्यांचाच विजय झाला आहे. इतर सर्वांचा या निवडणुकीत दारुण पराभव झाला आहे.

वरपूडकरांनी कुटुंबातीलच पाच सदस्यांना उमेदवारी दिल्याने जिल्हा परिषद निवडणुकीत त्याची चांगलीच चर्चा होती. परंतु परभणीकरांनी या घराणेशाहीला साफ नकार दिल्याचं आता मतमोजणीत स्पष्ट झालं आहे. सत्तेच्या सर्व चाव्या आपल्याकडेच ठेवण्याचा हा प्रयत्न मतदारांनी हाणून पाडला आहे.

एकाच कुटुंबातील 5 पैकी 4 जणांचा पराभव

1. समशेर वरपूडकर (मुलगा)- शिंगणापूर जिल्हा परिषद गटातून समशेर वरपूडकर यांचा ठाकरे गटाच्या पांडुरंग खिल्लारे यांनी पराभव केला.
2. सोनल देशमुख (मुलगी)- झरी सर्कल इथून ठाकरे गटाकडून निवडणूक लढवलेल्या सोनल देशमुख यांचा भाजपचे दिलीप देशमुख यांनी पराभव केला.
3. प्रेरणा वरपूडकर (सून)- दैठणा गटातून प्रेरणा वरपूडकर यांचा काँग्रेसच्या ज्योत्सना घाडगे यांनी पराभव केला.
4. बोणी वरपूडकर (पुतण्या)- बोणी वरपूडकर यांचा दुसरा पुतण्या अजित वरपूडकर यांनीच पराभव केला. लोहगाव गटात पुतण्या विरुद्ध पुतण्या अशी चुरस होती.

भाजपचे नेते सुरेश वरपूडकर यांचे पुतणे अजित अनिल वरपूडकर लोहगाव सर्कलमधून काँग्रेसच्या तिकिटावर निवडणूक लढत होते. त्यांचा विजय झाला असून वरपूडकर घराण्यातील अजित वरपूडकर हे एकमेव विजयी उमेदवार ठरले आहेत. “मला पाडण्यासाठीच भाजपने माझ्या विरोधात माझा चुलत भाऊ उभा केला होता,” असा गंभीर आरोप अजित वरपूडकर यांनी सुरेश वरपूडकर यांच्यावर केला आहे. माझ्या विजयाचं सगळं श्रेय मी माझ्या मित्रांना देतो, अशी पहिली प्रतिक्रिया काँग्रेसचे नवनिर्वाचे जिल्हा परिषद सदस्य अजित वरपूडकर यांनी टीव्ही 9 मराठीशी बोलताना दिली.