2020 पर्यंतची गुंठेवारी नियमित करण्याच्या निर्णयाची पुणे मनपा हद्दीत अंमलबजावणी करा, नगरविकास मंत्र्यांचे निर्देश
पुणे आणि पिंपरी चिंचवड मनपा हद्दीतील विविध विकासकामांचा नगरविकास मंत्री एकनाथ शिंदे यांनी आज आढावा घेतला. ही सर्व कामे दिलेल्या मुदतीत पूर्ण करण्याचे निर्देश शिंदे यांनी या दोन्ही मनपा आयुक्तांना दिले.
मुंबई : पुणे आणि पिंपरी-चिंचवड महानगरपालिकेच्या हद्दीतील गुंठेवारीची प्रकरणे नियमित करण्याबाबत नगरविकास विभागाने निर्गमित केलेल्या निर्णयाची अंमलबजावणी करण्याचे निर्देश नगरविकास मंत्री एकनाथ शिंदे यांनी दिले. पुणे आणि पिंपरी चिंचवड मनपा हद्दीतील विविध विकासकामांचा नगरविकास मंत्री एकनाथ शिंदे यांनी आज आढावा घेतला. ही सर्व कामे दिलेल्या मुदतीत पूर्ण करण्याचे निर्देश शिंदे यांनी या दोन्ही मनपा आयुक्तांना दिले. (Minister Eknath Shinde reviews various development works in Pune and Pimpri-Chinchwad)
31 डिसेंबर 2020 पर्यंतची गुंठेवारी नियमित करण्याचा महत्त्वपूर्ण निर्णय राज्य शासनाने घेतलेला आहे. या नियमांची अंमलबजावणी अजूनही सूरु झाली नसल्याचे निदर्शनास आल्याने, याबाबत शासनाने सर्व मनपा आयुक्तांना पत्र पाठवून या नियमांची अंमलबजावणी करण्यासाठी प्रस्ताव स्वीकारण्यास सांगितले होते. त्यानुसार आलेल्या प्रस्तावावर नियमांच्या अधीन राहून कार्यवाही करावी, तसेच कोणत्याही गुंठेवारीधारकास गुंठेवारी नियमित करण्याची इच्छा असल्यास त्याबाबत सकारात्मक कार्यवाही करण्याचे निर्देश दिले.
महापालिकेतील रिक्त पदे भरण्याचे निर्देश
पुणे महानगरपालिकेची हद्दवाढ झालेली आहे. यानंतर पुणे महानगरपालिकेतील रिक्त पदे भरण्यासाठी शासनाने परवानगी दिली आहे. तसंच भरतीसाठी पदांच्या आकृतिबंधाला देखील मंजुरी देण्यात आलेली आहे. ही भरती प्रक्रिया लवकरात लवकर पूर्ण करण्याचे निर्देश मंत्री शिंदे यांनी पुणे महानगरपालिकेचे आयुक्त विक्रमकुमार यांना दिले.
पुणे (@PMCPune) आणि पिंपरी चिंचवड महानगरपालिका हद्दीतील विविध विकासकामांचा नगरविकास मंत्री @mieknathshinde यांनी आढावा घेतला. विधानपरिषद उपसभापती @neelamgorhe उपस्थित होत्या. २०२० पर्यंतची गुंठेवारी नियमित करण्याच्या निर्णयाची अंमलबजावणी करण्याचे श्री. शिंदे यांनी निर्देश दिले. pic.twitter.com/rviXkhlwrh
— MAHARASHTRA DGIPR (@MahaDGIPR) September 3, 2021
पाणीपुरवठा नियमित करण्याबाबत सूचना
पिंपरी – चिंचवड महानगरपालिकेतील नागरिकांना 24 तास पाणी पुरवठा करण्यासाठी सुरू करण्यात आलेल्या अमृत योजना अत्यंत धीम्या गतीने सुरु असल्याचे समजले. शहरातील नागरिकांच्या पिण्याच्या पाण्याची गैरसोय होऊ नये यासाठी या योजनेच्या कामाला गती देण्याचे निर्देश त्यांनी पिंपरी चिंचवड मनपा आयुक्तांना दिले. तसेच ही योजना पूर्ण होईपर्यंत देखील शहरातील नागरिकांना एक दिवसाआड सुरु असलेला पाणी पुरवठा नियमित करण्याबाबत कार्यवाही करण्याचे निर्देश दिले.
यावेळी विधान परिषदेच्या उपसभापती डॉ. नीलम गोऱ्हे, राज्यसभा खासदार संजय राऊत, नगरविकास विभागाचे प्रधान सचिव भूषण गगराणी आणि महेश पाठक यांचेसह पुणे महानगरपालिकेचे आयुक्त विक्रम कुमार, पिंपर- चिंचवड महानगरपालिकेचे आयुक्त राजेश पाटील, शिवसेनेचे पुणे जिल्हाप्रमुख संजय मोरे आणि पिंपरी चिंचवड शहरप्रमुख ऍड. सचिन भोसले हे उपस्थित होते.
इतर बातम्या :
मेधा कुलकर्णींनी पंतप्रधानांना बांधली राखी, कोरोना काळात विधवा झालेल्या महिलांसाठी महत्वाचं मागणं
Minister Eknath Shinde reviews various development works in Pune and Pimpri-Chinchwad
