बापरे !!! १५ -१६ फूट खोल विहिरीत पडलेल्या महिलेचा अग्निशामक दलाच्या जवानांच्या तत्परतेमुळं वाचला जीव

सविता चौगुले विहिरीत पडल्याचे समजताच शेजाऱ्यांनी तातडीनं अग्निशामक दलाला फोन करून घटनेची माहिती दिली. अग्निशामक दलाने तात्काळ दखल घेत घटनास्थळावर धाव घेतली. वेळ न दवडता विहिरीत उतरले. दोरीचा वापर करत अवघ्या काही मिनिटातच पीडितेला पाण्याच्या बाहेर काढत तिचे प्राण वाचवले.

well

TV9 मराठी डिजीटल टीम | Edited By: भीमराव गवळी | Updated on: Nov 08, 2021 | 3:56 PM

पुणे- शहरातील सोमवार पेठे येथील दांडेकर(मोटे)वाड्यातील 15- 16 फूट खोल विहिरीत महिला पाय घसरून पडल्याची धक्कादायक घटना घडली आहे. मात्र घटनेची माहिती मिळताच अग्निशामक दलाच्या जवानांनी तत्परता दाखवत तात्काळ महिलेला बाहेर काढलं आहे. सविता चौगुले(42) असे पीडित महिलेचे नाव असून उपचारासाठी त्यांना केईएम रुग्णालयात दाखल करण्यात आले आहे.

सविता चौगुले या सद्यस्थितीला वारजे माळवाडी येथे वास्तव्यास आहेत. त्यांचे सोमवार पेठेतील दांडेकर(मोटे)वाड्यात जुने घर आहे. घटनेच्या वेळी त्या जुन्या घरी फेरफटका मारण्यास आल्या होत्या. त्याच दरम्यान विहिरीमध्ये डोकावून बघत असताना, त्यांचा पाय घसरल्यानं त्या विहिरीत पडल्या. सविता चौगुले विहिरीत पडल्याचे समजताच शेजाऱ्यांनी तातडीनं अग्निशामक दलाला फोन करून घटनेची माहिती दिली. अग्निशामक दलाने तात्काळ दखल घेत घटनास्थळावर धाव घेतली. वेळ न दवडता विहिरीत उतरले. दोरीचा वापर करत अवघ्या काही मिनिटातच पीडितेला पाण्याच्या बाहेर काढत तिचे प्राण वाचवले. अग्निशामक दलाने दाखवलेल्या तत्परतेमुळेच पीडितेचा जीव वाचल्याची भावना उपस्थित नागरिकांनी व्यक्त केली आहे. जीव वाचवण्यात यशस्वी ठरलेल्या अग्निशामक दलाचे व त्यांच्या कर्मचाऱ्यांचे नागरिकांनी आभारही मानले.अग्निशामक दलाचे अधिकारी प्रमोद सोनावणे व तांडेल राजाराम केदारी हे प्रत्यक्ष पाण्यात उतरून महिलेचा जीव वाचवला. या बचाव मोहिमेत प्रदीप खेडेकर, चालक हनुमंत कोळी, नवनाथ मांढरे व जवान छगन मोरे, सचिन जौंजाळे, प्रकाश शेलार, मयुर कारले, केतन नरके, विशाल गायकवाड यांचा सहभाग होता.