Pune Satara Highway Accident : कार डिव्हायडरला धडकून पलटली, त्याचवेळी विरुद्ध दिशेने येणाऱ्या ट्रकने..पुणे-सातारा रोडवर भयानक अपघात

सातारा-पुणे महामार्गावर शिरवळमध्ये मध्यरात्री भीषण अपघात घडला आहे. भरधाव कार डिवायडरला धडकून पलटली व विरुद्ध दिशेने येणाऱ्या ट्रकला धडकली. या भीषण अपघातात कारमधील चौघांचा मृत्यू झाला आहे. दोन जण जखमी झाले आहेत. पुणे-बंगळुरु महामार्गावर रात्री 1 वाजण्याच्या सुमारास हा अपघात घडला. मावळ तळेगावमधील चार तरुणांचा या अपघातात मृत्यू झाला. अपघातग्रस्त टाटा नेक्सॉन कारमधील चालकाचं स्टेअरिंगवरील नियंत्रण सुटल्यामुळे हा भीषण अपघात घडला. अपघातातील दोन जखमींवर रुग्णालयात उपचार सुरु आहेत. शिरवळ पोलीस ठाण्यात या अपघाताप्रकरणी गुन्हा दाखल झाला असून तपास सुरु आहे.

वेदांत वारिंगे, सोनलिंग ठाकूर, आदित्य गरुड आणि निखिल राऊत अशी मृत तरुणांची नावं आहेत. शिरवळच्या हॉटेल शिवालय समोर हा भीषण अपघात घडला. सारोळा महामार्ग पोलिसांनी क्रेनच्या मदतीने वाहन रस्त्यातून हटवून वाहतूक सुरळीत केली. मुंबई-पुणे एक्सप्रेस वे तसच पुण्याकडे जाणाऱ्या अन्य मार्गांवर आतापर्यंत अनेक अपघात घडले आहेत. मुंबई-बंगळुरु, जुना पुणे-मुंबई हायवे, पुणे-नाशिक मार्ग आणि तळेगाव-चाकण-शिक्रापूर हे चारही महामार्ग आतापर्यंत अपघाताचे हॉटस्पॉट ठरले आहेत. एका खासगी वर्तमानपत्राने दिलेल्या माहितीनुसार, मागच्या दोन-अडीच वर्षात या चार महामार्गांवर झालेल्या विविध अपघातांमध्ये आतापर्यंत जवळपास 355 जणांचा मृत्यू झाला आहे, त्याचेळी 492 जण गंभीर जखमी झाले आहेत.

या अपघाताची कारणं काय?

महामार्गांवर होणाऱ्या या अपघातांमागे काही ठराविक कारणं आहेत. उदहारणार्थ घालून दिलेल्या वेगमर्यादेपेक्षा जास्त स्पीड, चुकीच्या पद्धतीने ओव्हरटेक करणं, अचानक लेन बदलताना मागून येणाऱ्या वाहनाची धडक, मोबाइल सुरु असताना कार चालवणं आणि मद्यप्राशन करुन ड्रायव्हिंग अशी काही अपघाताची ठराविक कारणं आहेत. अवजड वाहनांमुळे होणाऱ्या अपघाताचं प्रमाण सुद्धा कमी नाही.