MNS | मनसेची मोठी राजकीय खेळी, लोकसभा निवडणुकीआधी बारामतीत हालचाली
महाराष्ट्राच्या राजकारणात कधी काय होईल, याचा काहीच भरोसा नाही. कोणता राजकीय नेता किंवा पक्ष कोणासोबत जावून हातमिळवणी करेल, हे आपल्या हातात नाही. असं असताना बारामतीत आज महत्त्वाच्या घडामोडी घडल्या आहेत. मनसेने बारामतीत नवी सुरुवात केलीय.
बारामती | 19 ऑक्टोबर 2023 : आगामी लोकसभा निवडणुकीच्या पार्श्वभूमीवर मनसे पक्ष चांगलाच कामाला लागला आहे. मनसेकडून पुणे जिल्ह्यात जोरदार तयारी सुरु आहे. विशेष म्हणजे मनसेने लोकसभा निवडणुकीच्या पार्श्वभूमीवर बारामतीत मध्यवर्ती शाखेचं उद्घाटन केलंय. मनसे अध्यक्ष राज ठाकरे हे स्वत: या कार्यालयाच्या उद्घाटनासाठी आले. बारामती लोकसभा मतदारसंघ हा राष्ट्रवादी काँग्रेसचे अध्यक्ष शरद पवार यांचा बालेकिल्ला आहे. या मतदारसंघात सध्या राष्ट्रवादीच्या नेत्या सुप्रिया सुळे या खासदार आहेत. बारामती मतदारसंघ हा शरद पवारांचा बालेकिल्ला मानला जातो. त्यामुळे भाजपसह मनसेलाही या मतदारसंघात आपलं वर्चवस्व निर्माण करायचं आहे.
राष्ट्रवादी काँग्रेसचे कार्यकर्ते, पदाधिकारी आणि नेत्यांचं मानसिक खच्चीकरण करायचं असेल तर शरद पवार यांच्या बालेकिल्ल्यात राष्ट्रवादीचा पराभव करायचा, असा भाजपचा मानस आहे. त्यामुळे भाजपकडून सातत्याने इथे प्रयत्न केले जात आहेत. यावेळीदेखील भाजपकडून तसे प्रयत्न केले जात आहेत. पण आता मनसेने देखील बारामती लोकसभा मतदारसंघात मध्यवर्ती शाखा सुरु केल्याने नवा ट्विस्ट निर्माण झालाय.
राज ठाकरेंना बारामतीत भेटले ‘अजित पवार’
मनसेकडून लोकसभा निवडणुकीच्या तयारीला सुरुवात झालीय. मनसे अध्यक्ष राज ठाकरेंच्या हस्ते बारामती लोकसभा मतदारसंघाच्या मध्यवर्ती कार्यालयाचे उद्घाटन पार पडले. मनसे नेते वसंत मोरेंवर बारामती लोकसभा मतदारसंघाची जबाबदारी देण्यात आलीय. बारामती लोकसभा मतदारसंघावर भाजपाठोपाठ मनसेचंही विशेष लक्ष असल्याचं या निमित्ताने स्पष्ट झालंय. यावेळी राज ठाकरे यांनी बारामतीत आपल्याला अजित पवार सापडल्याचं मिश्किल वक्तव्य केलं.
“आजचा कार्यक्रम फक्त कार्यलयाच्या उद्घाटनाचा आहे. वसंत मोरे अतिशय शिस्तबद्ध आहेत. बारामतीमध्ये अजित पवार सापडावा, मला माहिती नाही आमच्याकडे पण अजित पवार आहे. पण आयुष्यात मला कधी काका म्हणू नको”, असं मिश्किल वक्तव्य राज ठाकरे यांनी एका पदाधिकाऱ्याला उद्देशून केलं.
‘…पण आयुष्यात मला कधी काका म्हणून नको’
“महापालिकेच्या निवडणुका कधी होतील, मला माहिती नाही. या निवडणुका 2025 मध्ये होतील असं वाटतंय. देशात आणि राज्यात काय चालू आहे, काही कळत नाही. राजकारणाचा विचका करून टाकला आहे. आमच्याकडे पण अजित पवार आहेत. मला कळेना हल्ली काय ते कुठल्याही पक्षात जातात, पण आयुष्यात मला कधी काका म्हणून नको”, असं राज ठाकरे अजित पवार नावाच्या पदाधिकाऱ्याला उद्देशून म्हणाले.
“मार्च-एप्रिलमध्ये लोकसभा निवडणुका लागतील. त्याच्या तयारीला लागा. राज्यात जो राजकारणाचा विचका केला आहे त्याच्यातून महाराष्ट्राला बाहेर काढुया”, असं आवाहन राज ठाकरे यांनी यावेळी कार्यकर्ते आणि पदाधिकाऱ्यांना केलं.
