Pune Crime : ‘सिया’ने पुण्यातील पोलिस पाटलाला लावला 56 लाखांचा चुना, पुण्यात काय घडलं ?

पुण्यातील व्यावसायिक तरुण केतन अग्रवाल खून प्रकरणातील आरोपी सिया गोयल हिच्या नावाची चर्चा देशभर सुरू आहे. मात्र याच दरम्यान आता पुणे जिल्ह्यातून ‘सिया’ नावाच्या आणखी एका कथित महिलेकडून आर्तिक फसवणूक झाल्याचा प्रकार समोर आला आहे. ऑनलाइन शेअर ट्रेडिंगमध्ये मोठा परतावा मिळवून देण्याचे आमिष दाखवत चक्क एका पोलिसाची 56 लाखांची फसवणूक करण्यात आली असा आरोप आहे. “सिया” चा हाँ कारनामा समोर आल्यामुळे प्रचंड खळबळ माजली आहे. मुळशी तालुक्यात कार्यरत असलेल्या एका पोलिस पाटलाने या प्रकरणी पौड पोलिस ठाण्यात तक्रार दाखल केली आहे. 56 लाखांचा गंडा घातल्याच्या या प्रकरणी पोलिसांकडून अधिक तपास सुरू आहे.

संबंधित पोलिसाच्या तक्ररीनुसार, नोव्हेबर 2025 ते जानेवारी 2026 या कालावधीत आरोपींनी वेगवेगळ्या कारणांनी तक्रारदाराकडून टप्प्याटप्प्याने मोठी रक्कम गुंतवून घेतली. मात्र, प्रत्यक्षात या गुंतवणुकीतून कोणताही परतावा मिळाला नाही आणि गुंतवलेली मूळ रक्कमही परत करता आली नाही, असा आरोप आहे.

सोशल मीडियावरील जाहिरातीने फसवणुकीची सुरुवात

या संपूर्ण प्रकाराची सुरुवात सोशल मीडियावर दिसलेल्या एका आकर्षक जाहिरातीपासून झाली. ही जाहिरात एका नामांकित ब्रोकरेज कंपनीशी संबंधित असल्याचा भास निर्माण करण्यात आला होता. शेअर बाजारात कमी जोखमीमध्ये मोठा नफा मिळवून देण्याचे आश्वासन या जाहिरातीत देण्यात आलं होतं. तक्रारदाराने जाहिरातीवर क्लिक केलं, त्यानंतर त्यांना व्हॉट्सॲपवरील एका गुंतवणूकविषयक ग्रुपमध्ये सहभागी करण्यात आलं. या ग्रुपमध्ये शेअर बाजार, आयपीओ आणि ट्रेडिंगमधून मोठा नफा मिळवण्याबाबत सतत माहिती दिली जात होती.

‘सिया’ नावाच्या महिलेने साधला संपर्क

ग्रुपमध्ये सहभागी झाल्यानंतर ‘सिया’ नावाच्या एका महिलेने तक्रारदार इसमाशी संपर्क साधला. आपण स्वतः शेअर बाजारातील तज्ज्ञ आहोत, असं सांगत त्या सियाने गुंतवणुकीसाठी मार्गदर्शन करण्याचे आश्वासन दिले. तक्रारदाराचा विश्वास संपादन करण्यासाठी आरोपींनी सुरुवातीला एका बनावट ट्रेडिंग ॲप्लिकेशनचा वापर केला होता. या ॲपमध्ये सुरुवातीला काही रक्कम गुंतवल्यानंतर मोठा नफा झाला, असं खोटं चित्र दाखवण्यात आलं. त्यामुळे तक्रारदाराला हे व्यवहार खरे असल्याचा विश्वास वाटला. एवढंच नव्हे तर त्यांना सवलतीच्या दरात आयपीओ शेअर्स मिळतील, तसेच विशेष गुंतवणूक योजनांमधून मोठा परतावा मिळवून देण्याचे आमिषही दाखवण्यात आलं. या आमिषाला बळी पडून तक्रारदाराने वेळोवेळी बरीच मोठी रक्कम जमा केली.

ॲपमध्ये दिसला 10 कोटींचा बनावट नफा

तक्रारदाराने जसजशी अधिक गुंतवणूक केली, तसतसे संबंधित ट्रेडिंग ॲपच्या डॅशबोर्डवर त्यांच्या खात्याचे मूल्य वाढत असल्याचे दिसत होतं. काही काळानंतर या बनावट ॲपमध्ये त्यांच्या पोर्टफोलिओचे मूल्य तब्बल 10 कोटी रुपये झाल्याचे दाखवण्यात आलं. इतकी मोठी रक्कम मिळणार या विश्वासाने तक्रारदाराने पैसे काढण्याचा प्रयत्न केला. मात्र, त्यांना प्रत्यक्षात कोणतीही रक्कम मिळाली नाही.

पैसे काढण्यासाठी पुन्हा 30 लाखांची मागणी

त्यांनी पैसे काढण्याचा प्रयत्न केल्यानंतर आरोपींनी नवीन कारण पुढे केलं. कथित नफा आणि गुंतवणुकीची रक्कम सोडवण्यासाठी आणखी 30 लाख रुपये ‘सिक्युरिटी डिपॉझिट’ म्हणून जमा करावे लागतील, अशी मागणी आरोपींनी केली . मात्र, आधीच मोठी रक्कम गुंतवूनही पैसे परत मिळत नसल्याने तक्रारदाराने आणखी पैसे देण्यास नकार दिला. त्यानंतर आरोपींनी त्यांच्याशी संपर्क तोडला आणि गुंतवलेली 56 लाखांची रक्कमही परत केली नाही.

पोलिसांकडून तपास सुरू

आपली ऑनलाइन फसवणूक झाल्याचे लक्षात आल्यानंतर तक्रादार इसमाने पौड पोलिस ठाण्यात धाव घेतली. त्यांच्या तक्रारीनुसार पोलिसांनी ‘सिया’ नावाच्या महिलेबरोबरच तिच्या इतर अज्ञात साथीदारांविरोधात गुन्हा दाखल केला आहे. या प्रकरणाचा पुढील तपास पोलिसांकडून सुरू असून, बनावट ट्रेडिंग ॲप, सोशल मीडिया जाहिरात, आर्थिक व्यवहार आणि आरोपींच्या नेटवर्कचा शोध घेतला जात आहे.