MPSC टॉपर दर्शना पवार हत्याकांड, राहुल हंडोरे कसा पकडला? कुटुंबियांना किती वेळा फोन केले?; धक्कादायक माहिती समोर

पुणे : एमपीएससीला राज्यात सहावी आलेल्या दर्शना पवार हिचा मारेकरी राहुल हंडोरेला पोलिसांनी अटक केली आहे. पाच दिवस फरार झालेल्या राहुल हंडोरेला पकडण्यात अखेर पुणे ग्रामीण पोलिसांना यश आलं आहे. या पाच दिवसात तो महाराष्ट्रात आणि महाराष्ट्राबाहेर लपत फिरत असल्याची माहितीही समोर आली आहे. त्याची कसून चौकशी केली जात आहे. त्याच्याकडचा मोबाईलही जप्त करण्यात आला आहे. या मोबाईलमधून अनेक धक्कादायक माहिती समोर येण्याची शक्यता वर्तवली जात आहे. त्यानुषंगाने पोलिसांनी तपासही सुरू केला आहे.

दर्शना पवारची हत्या केल्यानंतर राहुल महाराष्ट्राबाहेर फरार झाला होता. आधी तो सांगलीला गेला होता. त्यानंतर तो गोव्याच्या मारगोवा येथे गेला होता. नंतर तो चंदीगडलाही गेला. शेवटी तो पश्चिम बंगालमधील हावडा येथे गेला होता. स्वत:चा पोलिसांपासून बचाव करण्यासाठी तो वारंवार जागा बदलत होता. या प्रवासात त्याने फोन स्विच्ड ऑफ ठेवला होता. त्यामुळे त्याला पकडणं कठिण झालं होतं. पण तो मुंबईत आल्यानंतर त्याचा सुगावा लागला आणि त्याच्या मुसक्या बांधता आल्या, असं पुणे पोलिसांनी सांगितलं.

पकडणं कठिण

दर्शनाच्या हत्येनंतर फरार झाल्यावर राहुल हंडोरे सातत्याने कुटुंबीयांच्या संपर्कात होता. त्याने कुटुंबीयांना पाचवेळा फोन केला होता. तसेच संपूर्ण माहिती तो घेत होता. कुटुंबीयांना फोन करताना तो स्वत:च्या फोनवरून फोन करत नसायचा. प्रवासात एखाद्या प्रवाशाला विनंती करून त्याच्या फोनवरून तो कुटुंबीयांशी संपर्क साधायचा. त्यामुळे त्याला पकडणं कठिण झालं होतं, असं पोलिसांनी सांगितलं.

अखेर तो पकडला

राहुल ज्या नंबरवरून कुटुंबीयांना फोन करायचा त्या नंबरवर आम्ही नंतर फोन करायचो. त्यावेळी संबंधित प्रवाशाकडून आम्हाला त्याची डिटेल्स मिळायची. मात्र, तो आमची पुढची स्टेप्स काय असणार आहे, याची माहितीही जाणून घ्यायचा. आम्ही त्याला पकडण्याचा प्रत्येकवेळी प्रयत्न केला. पण तो प्रत्येकवेळी ठिकाणं बदलायचा. त्यामुळे तो आमच्या हाती आला नाही. मात्र, तो अंधेरी स्टेशनवर पोहोचणार असल्याची खबर आम्हाला मिळाली अन् त्यानंतर तो आमच्या तावडीत सापडला, असं पोलिसांनी सांगितलं.

भावासोबत राहायचा

राहुल गेल्या काही वर्षापासून त्याच्या भावासोबत राहत होता. पुण्यात दोघेही राहत होते. तिथेच तो फुड डिलिव्हरी बॉय म्हणून काम करत होता. त्याचा भाऊही छोटेमोठे काम करत होता. राहुल पार्टटाईम जॉब करून एमपीएससीची परीक्षा देत होता, असंही पोलिसांनी सांगितलं.