उजनी धऱण थंडीने गारठले, माशांच्या भावात वाढ; थंडी आणि दरवाढीचा काय संबंध?

पुण्यातील उजणी धरण थंडीने गारठल्यामुळे मच्छीमारांना मासेमारी करण्यास अडचण येत आहे. त्यामुळे माशांचे भावही वाढले आहेत. pune fish Rate increased

Prajwal Dhage | Updated on: Dec 09, 2020 | 5:15 PM

पुणे : गेल्या काही दिवसांपासून पारा घसरल्याने सर्वत्र थंडी जाणवत आहे. कित्येकांना ही थंडी अल्हाददायक वाटत आहे. मात्र, थंडी वाढल्यामुळे मासेमारी व्यवसाय अडचणीत सापडल्याचे सध्या चित्र आहे. पुण्यातील उजणी धरण थंडीने गारठल्याने मच्छीमारांना मासेमारी करण्यास अडचण येत आहे. त्यामुळे माशांचे भावही वाढले आहेत. (Rate of fishes has increased in pune due to winter)

थंडी आणि दरवाढीचा काय संबंध?

उजनी धरणात पाणी मोठ्या प्रमाणात उपलब्ध आहे. थंडीमुळे या पाण्याचा गारठा वाढला आहे. या दोन्ही कारणांमुळे मासे वास्तव्यासाठी पाण्याच्या खोलवर जातात आहेत. परिणामी मच्छीमारांच्या जाळ्यात मासे सापडण्याचे प्रमाण कमी झाले आहे. त्यात आणखी भर म्हणून या धरणात माशांचे बीजदेखील टाकण्यात आलेले नाही. त्यामुळे मासेमारी करणे कठीण होऊन बसले आहे. परिणामी मासळी बाजारात माशांची आवक कमी झाली आहे. आवकच घटल्याने माशांच्या दरात वाढ झाली आहे.

उजणी धऱण गोड्या पाण्याच्या मासेमारीसाठी प्रसिद्ध

उजनी धरणामुळे इंदापूर तालुक्यात मासेमारी व्यवसाय मोठ्या प्रमाणात फोफावलेला आहे. राज्यात गोड्या पाण्याची सर्वात मोठी मासेमारी याच धरणात होते. त्यामुळे इंदापूर येथील कृषी उत्पन्न बाजार समितीचा मासळी व्यवसाय मोठ्या प्रमाणात विस्तारलेला आहे. मात्र, आवक घटलेली असताना, ग्राहकांकडून मागणी वाढल्याने माशांचे भाव वधारले आहेत.

पूर्वीचे दर सध्याचे दर

चिलापी 60 ते 70 रु 100 ते 120 रु

वाम्ब 300 ते 350 रु 400 ते 450 रु

मृगळ 250 रु 350 रु

कटला 100 ते 120 रु 150 ते 160 रु

शिंगाड़ा 150 रु 220 रु

खेकड़ा 100रु 150 रु

गुगळी 180 ते 200 रु 250 ते 260 रु

रव 100 ते 120 150 ते 160 रु