Pune : किरीट सोमय्या हल्ला प्रकरणी शिवसैनिक पोलीस ठाण्यात हजर, सोमय्या राज्यपालांच्या भेटीला
शिवसेना (Shivsena) शहरप्रमुख संजय मोरे यांच्यासह किरण साळी, सुरज लोखंडे, चंदन साळुंके, आकाश शिंदे, रूपेश पवार, राजेंद्र शिंदे सनी गवते यांच्यावर गुन्हे दाखल करण्यात आले होते.
पुणे : भाजपचे माजी खासदार किरीट सोमय्या (Kirit Somaiya) हे शनिवारी पुण्याच्या दौऱ्यावर होते. जम्बो कोविड सेंटरमध्ये घोटाळा झाल्याचा आरोप करत माहिती घेण्यासाठी किरीट सोमय्या पुणे (Pune) महापालिकेच्या इमारतीमध्ये पोहोचले होते. नेमक्या त्याच वेळी पुण्यातील शिवसैनिक पुणे महापालिकेतील भ्रष्टाचारासंबधी निवेदन किरीट सोमय्यांना देण्यासाठी जमले होते. यावेळी मोठा गोंधळ झाला. त्या गोंधळात किरीट सोमय्या पुणे महापालिकेच्या पायऱ्यांवर पडले.त्यांच्या माकडहाडाला दुखापत झाली होती. त्यानंतर त्यांना संचेती रुग्णालयात दाखल करण्यात आलं होतं. किरीट सोमय्यांकडून शिवसैनिकांचा खून करण्याचा प्रयत्न असल्याचा आरोप करण्यात आला होता. त्यानंतर शिवसैनिकांवर गुन्हे दाखल झाले होते. शिवसेना (Shivsena) शहरप्रमुख संजय मोरे यांच्यासह किरण साळी, सुरज लोखंडे, चंदन साळुंके, आकाश शिंदे, रूपेश पवार, राजेंद्र शिंदे सनी गवते यांच्यावर गुन्हे दाखल करण्यात आले होते. आज शिवसेना शहरप्रमुख संजय मोरे यांच्यासह इतर शिवसैनिक शिवाजीनगर पोलीस ठाण्यात दाखल झाले आहेत.
शिवसैनिक शिवाजीनगर पोलीस ठाण्यात दाखल
किरीट सोमय्या हल्ला प्रकरणी गुन्हा दाखल असलेले शहरप्रमुख संजय मोरे, युवा सेना सहसचिव किरण साळी यांच्यासह सात जण शिवाजीनगर पोलीस ठाण्यात हजर झाले आहेत. शनिवारी घडलेल्या प्रकाराबद्दल शिवसेना शहरप्रमुख संजय मोरे यांच्यासह किरण साळी, सुरज लोखंडे, चंदन साळुंके, आकाश शिंदे, रूपेश पवार, राजेंद्र शिंदे सनी गवते या आठ जणांवर 143,149, 147,341, 337 व 336 या कलमांनुसार गुन्हा दाखल करण्यात आला आहे.
सनी गवते याला जामीन
किरीट सोमय्या हल्ला प्रकरणी शिवसैनिकांवर विविध कलमांअतंर्गत गुन्हा दाखल करण्यात आला होता. सनी गवते हा शिवसैनिक पोलिसांसमोर हजर झाला होता. सनी गवते या सनी गवते या शिवसैनिकाची जामिनावर सुटका करण्यात आली. आज इतर शिवसैनिक शिवाजीनगर पोलीस ठाण्यात पोहोचले आहेत.
संजय मोरे यांच्याकडून किरीट सोमय्यांविरोधात तक्रार
भाजपचे माजी खासदार किरीट सोमय्यांनी अंगावर गाडी घालण्याचा प्रयत्न केल्याचा आरोप करत संजय मोरे यांनी त्यांच्या विरोधात गुन्हा दाखल केला होता.
किरीट सोमय्या राज्यपालांना भेटणार
भाजप नेते किरीट सोमय्या आज राज्यपाल भगतसिंह कोश्यारी यांना आज भेटणार आहेत. तर, येत्या काही दिवसात गृहमंत्री अमित शाह यांच्याकडे देखील तक्रार करणार असल्याची माहिती आहे.
इतर बातम्या:
‘जशी त्यांनी आंबेडकरी गाणी गायली नाहीत तशी…’ लता मंगेशकर यांच्यावर आंबेडकरांची टिप्पणी
