पुन्हा राहुल नार्वेकरच… विधानसभा अध्यक्ष बिनविरोध निवडला जाणार; विरोधकांचं काय होणार?

Rahul Narvekar Assembly Speaker : भाजप नेते आणि आमदार राहुल नार्वेकर यांची पुन्हा एकदा विधानसभा अध्यक्षपदी निवड होणार असल्याचे जवळपास निश्चित झाले आहे. राहुल नार्वेकर यांनी आज सकाळी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या अध्यक्षतेखाली विधानसभा अध्यक्षपदासाठी अर्ज दाखल केला. आज दुपारी १२ वाजेपर्यंतच विधानसभा अध्यक्षपदासाठी अर्ज दाखल करण्याची मुदत होती. मात्र अद्याप कोणीही अर्ज दाखल न केल्याने त्यांची बिनविरोध निवड होण्याची शक्यता वर्तवली जात आहे.

कालपासून मुंबईत विधानसभेचे विशेष अधिवेशन पार पडत आहे. शनिवारी आणि रविवार या दोन दिवसांमध्ये 288 आमदारांना विधानसभेच्य सदस्यत्वाची आणि गोपनीयतेची शपथ देण्यात येत आहे. यासाठी भाजपचे ज्येष्ठ नेते कालिदास कोळंबकर यांची हंगामी विधानसभा अध्यक्ष म्हणून निवड करण्यात आली. यानंतर उद्या 9 डिसेंबर रोजी विधानसभा अध्यक्षांची निवड करण्यात येणार आहे. यासाठी आज अर्ज दाखल करण्यात आले.

यानुसार राहुल नार्वेकर यांनी आज विधानसभा अध्यक्षपदासाठी उमेदवारी अर्ज दाखल केला. राहुल नार्वेकरांच्या विरोधात विरोधी पक्षांकडून एकाही उमेदवाराने अर्ज दाखल केलेला नाही. त्यामुळे राहुल नार्वेकरांची विधानसभा अध्यक्षपदी बिनविरोध निवड होणार हे निश्चित मानले जात आहे. विधानसभा अध्यक्षपदासाठी उमेदवारी अर्ज दाखल करण्याची मुदत ही आज दुपारी 12 वाजेपर्यंत होती. या मुदतीत महाविकासाआघाडीने एकही उमेदवारी अर्ज दाखल केलेला नाही.  त्यातच यंदा महायुतीकडे प्रचंड संख्याबळ आहे. त्यामुळे राहुल नार्वेकर यांची विधानसभा अध्यक्षपदावरील निवड होईल हे निश्चित झाले आहे.

सलग दुसऱ्यांदा शपथ घेणारे महाराष्ट्रातील पहिले अध्यक्ष

महाराष्ट्राचे उपमुख्यमंत्री एकनाथ शिंदे यांनी शिवसेनेत बंड केले आणि भाजपसोबत सत्ता स्थापन केली. यानंतर भाजपने विधानसभा अध्यक्षपदावर दावा करत त्याची जबाबदारी राहुल नार्वेकरांकडे दिली. यानंतर आता पुन्हा एकदा राहुल नार्वेकर यांच्याकडे विधानसभेचं अध्यक्षपद जाणार आहे. यामुळे विधानसभेच्या अध्यक्षपदी सलग दुसऱ्यांदा शपथ घेणारे महाराष्ट्रातील पहिले अध्यक्ष म्हणून त्यांची नोंद केली जाणार आहे.

राहुल नार्वेकरांचा अल्पपरिचय

राहुल नार्वेकर हे वकील असून त्यांनी शिवसेनेतून राजकीय कारकि‍र्दीला सुरुवात केली. राहुल नार्वेकरांनी शरद पवारांच्या नेतृत्वाखालील राष्ट्रवादी काँग्रेसमध्ये प्रवेश केला होता. २०१९ च्या निवडणुकीपूर्वी त्यांनी भाजपामध्ये प्रवेश केला. यानंतर त्यांनी दक्षिण मुंबईतील कुलाबा मतदारसंघातून भाजपाच्या तिकिटावर निवडणूक लढवली आणि विजय मिळवला.

यानंतर आता झालेल्या २०२४ च्या निवडणुकीत देखील ते याच मतदारसंघातून निवडणुकीच्या रिंगणात उतरले. ते विजयी झाले. राहुल नार्वेकर हे २०२२ मध्ये महायुतीचे सरकार आल्यानंतर विधानसभेच्या अध्यक्षपदी विराजमान झाले. त्यावेळी त्यांचे सासरे रामराजे नाईक निंबाळकर हे महाराष्ट्र विधानपरिषदेचे सभापती होते. त्यामुळे एकाचवेळी सासरे आणि जावई विधिमंडळाच्या दोन सभागृहांचे पीठासीन अधिकारी म्हणून कार्यरत होते. सर्वात कमी वयाचे विधानसभा अध्यक्ष म्हणून त्यांची नोंद झाली आहे.