‘भाजपला परिणाम भोगावे लागतील’, माढ्यात भाजपमध्ये अंतर्गत धुसफूस? नाराजीनाट्य कुठपर्यंत जाणार?
माढ्यात भाजपमध्ये अंतर्गत धुसफूस असल्याचं आता स्पष्ट होत आहे. खासदार रणजितसिंह नाईक निंबाळकर यांना पुन्हा उमेदवारी मिळाल्याने भाजप नेते धैर्यशील मोहिते पाटील नाराज झाले आहेत. त्यांनी आज महत्त्वाची बैठक बोलावली होती. या बैठकीत मोठे नेते उपस्थित होते.
सोलापूर | 17 मार्च 2024 : भाजपकडून लोकसभा निवडणुकीसाठी महाराष्ट्रातील 20 उमेदवारांची नावे जाहीर करण्यात आली आहेत. या उमेदवारांमध्ये माढ्याचे सध्याचे विद्यमान खासदार रणजितसिंह नाईक निंबाळकर यांना पुन्हा संधी देण्यात आली आहे. पण या निवडणुकीसाठी भाजपचे नेते धैर्यशील मोहिते-पाटील हे देखील इच्छुक आहेत. त्यांनी आपण निवडणूक लढवणार असल्याचं जाहीर करत लोकसभा निवडणुकीसाठी शड्डूही ठोकला होता. पण भाजपकडून रणजितसिंह यांना उमेदवारी जाहीर झाल्याने धैर्यशील मोहीत-पाटील नाराज झाले आहेत. त्यांनी आज अकलूज येथे त्यांच्या शिवरत्न बंगल्यावर बैठक बोलावली. मोहिते पाटील यांना उमेदवारी न दिल्यास भाजपला परिणाम भोगावे लागतील, असा इशारा धैर्यशील मोहीते-पाटील यांच्या समर्थकांनी दिलाय.
धैर्यशील मोहिते पाटील यांनी भाजपकडून माढा लोकसभेची उमेदवारी मागितली होती. मात्र रणजितसिंह नाईक निंबाळकर यांना दुसऱ्यांदा उमेदवारी दिल्याने मोहिते पाटील गट नाराज झालाय. मागील काही दिवसांपासून मोहिते पाटील आणि नाईक निंबाळकर यांच्यात राजकीय वाद निर्माण झाल्याची चर्चा होती. त्यामुळे आज मोहिते पाटील नक्की काय भूमिका घेतात आणि कार्यकर्त्यांना काय संदेश देतात हे पाहणे महत्वाचं मानलं जात होतं.
बैठकीला दिग्गज नेत्यांची हजेरी
बैठक सुरु होण्याआधी या बैठकीला फलटणचे माजी मंत्री रामराजे निंबाळकर, शेकापचे जयंत पाटील, करमाळ्याचे माजी आमदार नारायण आबा पाटील, धैर्यशील मोहिते पाटील उपस्थित राहणार असल्याची माहिती समोर येत होती. त्यानुसार हे दिग्गज नेते देखील बैठकीला हजर राहिल्याची माहिती समोर आली आहे. या बैठकीचा व्हिडीओदेखील समोर आला आहे. मोहिते पाटील कुटुंबातील धैर्यशील मोहिते पाटील आणि जयसिंह उर्फ बाळ दादा मोहिते पाटील बैठकीला उपस्थित होते. ही बैठक पार पडल्यानंतर मोहिते पाटील यांच्या समर्थक आणि कार्यकर्त्यांनी ‘टीव्ही 9 मराठी’ला प्रतिक्रिया दिली.
‘भाजपला परिणाम भोगावे लागणार’, कार्यकर्त्यांच्या आक्रमक प्रतिक्रिया
“गेल्या लोकसभा निवडणुकीत मोहिते पाटलांनी 1 लाखांपेक्षा जास्त मताधिक्यांनी निंबाळकरांना निवडून दिलं होतं. भाजपने आता यावेळेस मोहिते पाटलांना तिकीट न देवून खूप मोठी चूक केली आहे. याचा परिणाम तीन मतदारसंघांमध्ये दिसणार आहे. बारामती, सोलापूर आणि माढा या मतदारसंघांमध्ये त्याचा परिणाम भाजपला भोगावा लागेल”, अशी प्रतिक्रिया एका कार्यकर्त्याने दिली. तर “मोहिते पाटलांनी असं काय केलं होतं की त्यांना तिकीट दिलं नाही? आमच्या कार्यकर्त्यांमध्ये प्रचंड नाराजी आहे. आम्ही भाजपला धडा शिकवल्याशिवाय राहणार नाही. येत्या निवडणुकीत सोलापूर जिल्ह्यातील चार मतदारसंघांमध्ये खूप मोठा परिणाम भोगावा लागणार आहे”, अशी प्रतिक्रिया मोहिते पाटील यांच्या दुसऱ्या समर्थकाने दिली.
