महाराष्ट्राच्या माजी मुख्यमंत्र्यांची राजकारणातून निवृत्ती? देशातल्या बड्या नेत्याची निवडणूक लढवणार नसल्याची मोठी घोषणा
भाजप नेते निलेश राणे यांनी अचानक ट्विटरवर आपण राजकारणातून निवृत्त होत असल्याची पोस्ट टाकून राजकीय वर्तुळात खळबळ उडवून दिली होती. त्यांची आज देवेंद्र फडणवीस यांनी समजूत काढली. त्यानंतर त्यांनी निवृत्तीचा निर्णय मागे घेतला. यानंतर महाराष्ट्राच्या एका माजी मुख्यमंत्र्यांनीदेखील एक मोठी घोषणा केलीय.
सागर सुरवसे, Tv9 मराठी, सोलापूर | 25 ऑक्टोबर 2023 : महाराष्ट्राच्या राजकारणात सध्या अनेक घडामोडी घडत आहेत. काही घडामोडी उघडपणे घडताना दिसत आहेत. तर काही घडामोडी पडद्यामागे घडत आहेत. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस दिल्ली दौऱ्यावर गेले आहेत. त्यांची दिल्लीत केंद्रीय गृहमंत्री अमित शाह यांच्यासोबत बैठक होत आहे. राज्य मंत्रिमंडळाच्या विस्तारावर या बैठकीत शिक्कामोर्तब होण्याची शक्यता आहे. याशिवाय राज्यात आगामी काळात लोकसभेची निवडणूक असणार आहे. त्यामुळे आगामी काळात अतिशय महत्त्वाच्या राजकीय हालचाली घडण्याचे संकेत मिळत आहेत. असं असताना महाराष्ट्राच्या एका माजी मुख्यमंत्र्यांनी मोठी घोषणा केली आहे.
महाराष्ट्राच्या माजी मुख्यमंत्र्यांनी थेट राजकारणातून निवृत्त होण्याचे संकेत दिले आहेत. त्यांनी राजकारणातून संन्यास घेतोय, असं थेट म्हटलेलं नाही. पण यापुढे आपण एकही निवडणूक लढवणार नाही, असं मोठं वक्तव्य त्यांनी केलं आहे. तसेच पक्षाचं संघटनेचं काम आपण करत राहू, असं म्हटलं आहे. त्यामुळे राजकीय वर्तुळात त्यांच्या निवृत्तीच्या चर्चांना उधाण आलंय.
‘मी निवडणुकांमधून निवृत्ती घेतोय’
महाराष्ट्राचे माजी मुख्यमंत्री सुशीलकुमार शिंदे यांनी याबाबतची महत्त्वाची घोषणा केली आहे. सुशीलकुमार शिंदे यांनी राजकीय निवृत्तीच्या चर्चांवर स्पष्टीकरणही दिलं आहे. “मी निवडणुकांमधून निवृत्ती घेतोय. मात्र पक्षाचे काम करतच राहणार आहे”, असं सुशीलकुमार शिंदे म्हणाले आहेत. “मी 83 वर्षांचा झालोय. त्यामुळे पूर्वीसारखी धावपळ करणे होत नाही. मी निवडणुकांमधून निवृत्ती घेतोय. मात्र पक्ष संघटनेचे काम मी करतच राहणार आहे”, अशी प्रतिक्रिया सुशीलकुमार शिंदे यांनी दिलीय.
‘उमेदवार ठरवण्याचे अधिकार हायकमांडला’
सुशीलकुमार शिंदे यांनी याआधीच सोलापूरच्या लोकसभा मतदारसंघाचे उमेदवार कोण असेल याबाबत भाष्य केलंय. त्यांनी आपली कन्या आमदार प्रणिती शिंदे या सोलापूर लोकसभेच्या उमेदवार असतील, असं याआधी सांगितलं आहे. याबाबतही त्यांनी आज पुन्हा भूमिका स्पष्ट केली. “माझ्या दृष्टीने प्रणिती शिंदे या योग्य उमेदवार आहेत, असे मी म्हणालो. मात्र उमेदवार ठरवण्याचे अधिकार हायकमांडला आहेत. मी मूर्ख नाही की, प्रणिती शिंदे यांची उमेदवारी जाहीर करेन. कारण काँग्रेसमध्ये हायकमांडच उमेदवार ठरवतो”, अशी प्रतिक्रिया सुशीलकुमार शिंदे यांनी दिली.
