Supriya Sule : सुप्रिया सुळे यांचा ‘लंडन ठुमकदा’ गाण्यावर जबरदस्त डान्स; लेक रेवतीच्या संगीत समारंभातील व्हिडीओ चर्चेत
सुप्रिया सुळे यांची कन्या रेवती सुळेच्या संगीत समारंभातील विविध व्हिडीओ सोशल मीडियावर व्हायरल होत आहेत. एका व्हिडीओमध्ये सुप्रिया सुळे स्टेजवर डान्स करताना दिसत आहेत. 'लंडन ठुमकदा' या गाण्यावर त्यांनी ठेका धरला आहे.
राष्ट्रवादी काँग्रेस (शरद पवार) पक्षाच्या खासदार सुप्रिया सुळे यांची कन्या रेवती सुळेचा नुकताच धूमधडाक्यात लग्नसोहळा पार पडला. रेवतीने प्रसिद्ध उद्योजक अरुण लखानी यांचे पुत्र सारंग लखानीशी लग्नगाठ बांधली. शनिवारी 20 जून 2026 रोजी मुंबईतील जियो वर्ल्ड कन्वेन्शन सेंटरमध्ये हा विवाहसोहळा पार पडला. रेवती आणि सारंगच्या लग्नसोहळ्याचे, संगीत आणि मेहंदी समारंभाचे विविध फोटो, व्हिडीओ सध्या सोशल मीडियावर व्हायरल होत आहेत. त्यापैकीच एक व्हिडीओ सुप्रिया सुळे यांच्या डान्सचा आहे. लेक रेवतीच्या संगीत समारंभात सुप्रिया सुळे यांनी ‘लंडन ठुमकदा’ गाण्यावर ठेका धरला होता. त्यांच्या या डान्सच्या व्हिडीओने नेटकऱ्यांचं लक्ष वेधलं आहे.
फेब्रुवारी महिन्यात सुप्रिया सुळे यांनी रेवती आणि सारंग लखानी यांचं लग्न ठरल्याची बातमी सोशल मीडियावर शेअर केली होती. त्यांनी स्वत: अनेक पाहुण्यांना वैयक्तिक भेटून लग्नाची पत्रिका दिली होती. गेल्या काही दिवसांपासून सुळे आणि पवार कुटुंबात रेवतीच्या लग्नाची मोठी धूम पहायला मिळाली. संगीत समारंभासाठी मोठा स्टेज बांधण्यात आला होता. यावेळी कुटुंबातील अनेक सदस्यांनी डान्स केला. सुप्रिया सुळेसुद्धा लेकीच्या संगीत समारंभात मनसोक्त नाचल्या.
सुप्रिया सुळे यांच्या डान्सचा व्हिडीओ-
View this post on Instagram
फक्त सुप्रिया सुळेच नाही तर रेवतीच्या भावंडांनीही स्टेजवर परफॉर्म केलं होतं. दिवंगत उपमुख्यमंत्री अजित पवार यांचे पुत्र जय पवार आणि अजित पवार यांचे बंधू श्रीनिवास पवार यांचे पुत्र युगेंद्र पवार हे देखील स्टेजवर नाचताना दिसले. जय पवार यांनी ‘सोनी दे नखरे’ या गाण्यावर डान्स केला, तर ‘सुबह होने ना दे’ या गाण्यावर युगेंद्र पवार परफॉर्म करताना दिसले. सोशल मीडियावर या दोघांचाही व्हिडीओ तुफान व्हायरल होत आहे. रेवती सुळेच्या लग्नसोहळ्याला संपूर्ण पवार कुटुंब उपस्थित होतं. यावेळी रेवतीचे आजोबा शरद पवार हेसुद्धा व्हिलचेअरवरून पोहोचले होते.
रेवती सुळेनं नागपूरचे उद्योगपती आणि राजकारणी अरुण लखानी यांचा मुलगा सारंग लखानीशी लग्न केलं आहे. संगीत समारंभात बॉलिवूडचा ‘किंग’ अर्थात अभिनेता शाहरुख खान त्याच्या ‘कोई मिल गया’ या गाण्यावर डान्स करताना दिसला. यावेळी शाहरुखसोबत रेवतीसुद्धा थिरकली. लग्नसोहळ्यात अनेक बॉलिवूड सेलिब्रिटींची मांदियाळी पहायला मिळाली.
