Kalyan Politics | मनसेचे एकमेव आमदार VS मुख्यमंत्र्यांचे चिरंजीव, ‘पाकिटमार’ म्हणत सडकून टीका
कल्याण-डोंबिवली लोकसभा मतदारसंघावरुन सध्या मनसे आणि शिंदेंची शिवसेना आमनेसामने आलीय. आमदार राजू पाटील आणि खासदार श्रीकांत शिंदे यांच्यात चांगलात कलगीतुरा रंगलाय. त्यात दोघांचे कार्यकर्तेही मागे नाहीत.
कल्याण | 6 ऑक्टोबर 2023 : कल्याण-डोंबिवली लोकसभा मतदारसंघावरुन सध्या मनसे आणि शिंदेंच्या शिवसेनेत चांगलीच जुंपलीय. मनसेचे आमदार राजू पाटील आणि मुख्यमंत्री एकनाथ शिंदे यांचे पुत्र खासदार श्रीकांत शिंदे यांच्यात चांगलंच वाकयुद्ध रंगलंय. काही दिवसांपूर्वी राजू पाटील यांना भावी खासदार लिहिलेला केक कापला. इतकंच नाही तर साहेबांनी आदेश दिल्यास आपण कल्याण लोकसभा लढणार असल्याची घोषणाही त्यांनी केली. राजू पाटलांच्या घोषणेनंतर कल्याण लोकसभा मतदारसंघात आता वादाला तोंड फुटलंय.
खासदार श्रीकांत शिंदे यांनीही राजू पाटलांच्या आव्हानाला उत्तर देताना आजीच्या पुढे माजी लागायला नको याची काळजी घ्या, असा टोला लगावला. त्यावर राजू पाटलांनीही ट्वीट करत श्रीकांत शिंदे यांना चांगलंच डिवचलंय. “बापाने पॉकेट मनी म्हणून MMRDA, MSRDCचा निधी दिला म्हणून करोडोच्या बाता? कामाने उत्तर दिले असते तर समस्या उरल्याच नसत्या, रेल्वेच्या प्रवाश्यांना रोज मरणयातना भोगाव्या लागल्या नसत्या”, असं राजू पाटील ट्विटरमध्ये म्हणाले.
‘पाकिटमार’ म्हणत सडकून टीका
राजू पाटलांच्या ट्वीटनंतर आता शिंदे गटातील नेत्यांकडूनही राजू पाटलांना लक्ष्य केलं जातंय. युवासेनेचे सचिव दीपेश म्हात्रे यांनी राजू पाटलांचा उल्लेख पाकीटमार दादा असा केलाय. “बिल्डरांकडून ‘पॉकेटमनी’ घेऊन भुमिपुत्रांची ‘पाकिटमारी’ करणाऱ्यांनी इतरांचा पॉकेटमनी काढू नये. भूमिपुत्रांना विकणाऱ्या या दलालांना आता जनताच ‘माजी’ करून टाकणार! आता जनतेचा ‘वादा’, घरी जाणार पाकीटमार ‘दादा’!”, अशी खोचक टीका दीपेश म्हात्रे यांनी केली.
आता रिल्सवॉर सुरु
हा वाद केवळ टीका-टिप्पणी वा ट्विटरवॉरवरच थांबलेला नाही. तर आता या दोन्ही पक्षात आणि नेत्यांमध्ये रिलवॉरही सुरु झालंय. श्रीकांत शिंदे समर्थकांकडून राजू पाटलांचा एक छेडछाड केलेला फोटो व्हायरल करण्यात येतोय. इतकंच नाही तर राजू पाटलांनी ट्वीट करत श्रीकांत शिंदे यांच्यावर जी टीका केली होती, त्यावरील लोकांच्या कमेंट्सचा एक रिल बनवत तोही व्हायरल केला जातोय.
शिंदे समर्थकांकडून व्हायरल करण्यात आलेल्या रिलला आता राजू पाटलांच्या कार्यकर्त्यांनीही त्याचप्रकारे उत्तर दिलंय. पाटलांच्या आजवरच्या कामाचे, पाहणीचे, बैठकींचे फोटो दाखवत, शेवटी आपका क्या होगा माजदार? असा सवाल श्रीकांत शिंदे यांना करण्यात आलाय. आधी ट्वीटरवॉर आणि आता रिल वॉर. कल्याण लोकसभेवरुन मनसे आणि शिंदेंच्या शिवसेनेत सुरु झालेलं हे राजकीय युद्ध पुढे चालून काय रंग घेतं, हे पुढे दिसेलंच.
