Wardha News : मंदिरावरील झेंडा बदलत होते, मात्र देवाच्या मनात काही वेगळेच होते, वर्ध्यात काय घडलं?
सणाचा दिवस असल्याने तिघे जण गावातील मंदिरावरील झेंडा उतरवत होते. मात्र नियतीच्या मनात वेगळेच होते. अचानक जे घडलं त्याने गावात शोककळा पसरली.
वर्धा / 30 ऑगस्ट 2023 : मंदिरावरील झेंडा बदलत असताना विद्युत प्रवाहाचा धक्का लागल्याने तीन जणांचा जागीच मृत्यू झाला. वर्धेच्या पिपरी (मेघे)) येथील तुळजाभवानी मंदिरात आज सकाळी ही दुर्दैवी घटना घडली. तिघे मंदिरावर चढून झेंडा बदलत असताना झेंड्याच्या खांबाचा विद्युत तारेला स्पर्श झाल्याने ही दुर्घटना घडली. अशोक सावरकर, सुरेश झिले, अशोक उर्फ बाळू शेर अशी मयतांची नावे आहेत. या घटनेमुळे गावात शोककळा पसरली आहे. घटनास्थळी पोलीस अधिकाऱ्यांनी भेट देत पाहणी केली. ऐन सणाच्या दिवशी तिघांचा दुर्दैवी मृत्यू झाल्याने सर्वत्र हळहळ व्यक्त होत आहे.
झेंडा बदलत होते पण नियतीच्या मनात वेगळेच होते
आज रक्षाबंधनाचा सण असल्याने गावातील मंदिरावरील झेंडा बदलण्यासाठी अशोक सावरकर, सुरेश झिले, अशोक उर्फ बाळू शेर हे तिघे जण मंदिरावर चढले होते. झेंडा बदलत असतानाच झेंड्याचा लोखंडी पाईपचा मंदिराच्या वरुन गेलेल्या विद्युत तारांना स्पर्श झाला. यामुळे वीजप्रवाह लोखंडी पाईपमध्ये उतरला. यावेळी हातात झेंडा धरुन असलेल्या तिघांना वीजेचा धक्का लागला. यानंतर तिघेही खाली कोसळले.
तात्काळ रुग्णालयात नेले पण…
तिघांना तात्काळ रुग्णालयात नेण्यात आले. मात्र डॉक्टरांनी त्यांना मृत घोषित केले. घटनेची माहिती मिळताच पोलिसांनी घटनास्थळी धाव घेत पाहणी केली. या घटनेमुळे गावात शोककळा पसरली आहे.
