तर आम्हीही तुझ्याशी बोललो नसतो, पक्ष फुटीनंतर घरात नेमकं काय घडलं?; रोहित पवार यांनी सांगितला किस्सा

अजित पवार यांनी बंड केलं आणि पक्षात फूट पडली. अजित पवार यांनी भाजपबरोबर जाण्याचा निर्णय घेतला. तर शरद पवार यांनी महाविकास आघाडीसोबतच राहण्याचा निर्णय घेतला. अजितदादांच्या या निर्णयामुळे नुसता राष्ट्रवादी पक्षच फुटला नाही, तर पवार कुटुंबही फुटलं. कुटुंबात दोन गट पडले. कुटुंबातील काही लोकांनी अजितदादांनी साथ दिली. तर काहींनी शरद पवारांना. पण शरद पवार यांना साथ देणारा कुटुंबातील घटक अधिक आहे. पक्ष फुटण्याच्या काळात कुटुंबात नेमकं काय घडत होतं. घरातील मुलांवर काय परिणाम होत होता, त्यांची मानसिकता काय झाली होती? याची प्रचिती देणारा एक किस्साच आमदार रोहित पवार यांनी सांगितला. त्यावरून पवार कुटुंबातील आजच्या पिढीवर या पक्ष फुटीचा किती खोल परिणाम झाला हे स्पष्ट होतं.

शरद पवार गटाचे आमदार रोहित पवार हे इंदापुरात होते. प्रचार करत असताना एका सभेत त्यांनी घरातीलच किस्सा सांगितला. आमचे आजोबा शरद पवार यांनी 60 वर्ष जो विचार जपला तो विचार ते आजही जपत आहेत. त्यांनी त्यांची भूमिका बदललेली नाही. जेव्हा ही कुटुंब फुटल्याची घटना घडली तेव्हा माझ्या लहान मुलांनी मला विचारले की, तू कुणाबरोबर आहेस? मी सांगितले मी आजोबा बरोबर आहे. त्यावर ते म्हणाले, तू जर आजोबा बरोबर गेला नसतास तर आम्ही तुझ्याशी बोललो नसतो, असं रोहित पवार यांनी सांगितलं.

मुलं म्हणाली असती गेट आऊट…

माझी मुलं एवढंच बोलून थांबली नाहीत. मुलं म्हणाली, आता आम्ही लहान आहोत. ज्या वेळेस आम्ही शिकून मोठे झालो असतो, त्यावेळेस तुला सांगितलं असतं की, आता तू तुझं वेगळं घर बघ, असं रोहित पवार म्हणाले. म्हणजे याची भीती अशी आहे की 15 वर्षांनी माझी मुलं देखील मला म्हटले असते की, जा आता तू गेट आउट. यावर मला युक्तिवाद करता आला नसता. कारण मी माझ्या आजोबांबरोबर असं वागलो असतो तर माझी मुलंही माझ्याशी तशीच वागली असती, असा कौटुंबिक किस्साच रोहित पवार यांनी सांगितला.

माझा अरविंद केजरीवाल होणार

माझ्यावर कारवाई होणार हे मला माहीत होतं. मात्र ते माहीत असतानाही मीही भूमिका घेतली. कारण ती खरी भूमिका घेणं फार महत्त्वाचं होतं. त्यामुळे आमच्यावर बऱ्याच कारवाई झाल्या आणि आणखीन होणार आहेत. लोकसभा झाल्यानंतर कदाचित दिल्लीचे मुख्यमंत्री अरविंद केजरीवाल यांच्यासारखी देखील माझ्यावर कारवाई केली जाईल, असं काही भाजपच्याच लोकांनी मला सांगितले आहे. जे भाजपच्या कोअर कमिटीमध्ये बसतात त्यांनी सांगितलंय की, लोकसभा झाल्यानंतर त्याच्याकडे बघू. त्याचा अरविंद केजरीवाल करू. मात्र आम्ही त्यास घाबरत नाही, असं रोहित पवार म्हणाले.