या तीन बड्या नेत्यांचा आग्रह अन् मंत्रिपद मिळालं, भुजबळांनी थेट नावच घेतलं

लोकसभा निवडणुकीत महाविकास आघाडीला राज्यात मोठं यश मिळालं होतं. मात्र त्यानंतर झालेल्या विधानसभा निवडणुकीत महायुतीनं जोरदार पुनरागमन केलं. महायुतीला स्पष्ट बहुमत मिळालं, महायुतीचा राज्यात तब्बल 232  जागांवर विजय झाला तर दुसरीकडे महाविकास आघाडीला अवघ्या 50 जागांवरच समाधान मानावं लागलं, दरम्यान राज्यात पुन्हा एकदा महायुतीचं सरकार आल्यानंतर मंत्रिमंडळ विस्तारात अनेक नव्या चेहऱ्यांना संधी देण्यात आली होती, तर काही अनुभवी चेहऱ्यांना डावलण्यात आलं होतं. त्यामध्ये राष्ट्रवादी अजित पवार गटाचे नेते छगन भुजबळ यांचा देखील समावेळ होता. मंत्रिपद न मिळाल्यानं गेल्या अनेक दिवसांपासून भुजबळ नाराज होते. त्यांनी अनेकदा आपली नाराजी देखील बोलून दाखवली होती.

अखेर आता पुन्हा एकदा भुजबळ यांना मंत्रिपद मिळालं आहे, भुजबळ यांनी मंत्रिपदाची शपथ घेतली. दरम्यान त्यांनतर त्यांनी काही गौप्यस्फोट देखील केले आहेत.  मागच्या मंगळवारी आमची बैठक झाली आणि तेव्हाच ठरलं होतं की शपथ घ्यायची आहे, पण मी कोणालाच नाही सांगितलं, असा गौप्यस्फोट यावेळी भुजबळ यांनी केला आहे. पुढे बोलताना ते म्हणाले की, मोदी साहेब आणि केंद्रीय गृहमंत्री अमित शाह यांनी त्यावेळीच सांगितलं होतं की दुरुस्त करायला पाहिजे. मुख्यमंत्री देवेंद्र फडणवीस यांनी देखील प्रयत्न केले असंही यावेळी भुजबळ यांनी म्हटलं.

दरम्यान छगन भुजबळ यांना आता मंत्रिपद मिळालं आहे, त्यामुळे नाशिकचं पालकमंत्रिपद कोणाला मिळणार याबाबत मोठी उत्सुकता निर्माण झाली आहे. यावर देखील यावेळी भुजबळ यांनी प्रतिक्रिया दिली आहे. मी पालकमंत्री नसलो तरी काम करण्याची माझी तयारी आहे, मी पालकमंत्री असलो नसलो तरी काही फरक पडणार नाही.  मी नाशिकचा बालक आहे,  पालक नसलो तर काय झालं? पालकमंत्रिपदाबाबत मुख्यमंत्री योग्य तो निर्णय घेतील, असंही यावेळी भुजबळ यांनी म्हटलं आहे.

तसेच  नाशिकमध्ये मला विशेष प्रेम दिलं जात.  मी नाशिकच्या लासलगाव, येवला या मतदार संघातून निवडून येतो. मागील काळात मोठ्या प्रमाणात प्रगती झाली, असंही भुजबळ यांनी म्हटलं.