पहिला पाकिस्तानी ज्याने अयोध्येत जाऊन घेतले रामलल्लाचे दर्शन, भावूक होत म्हटले…

इस्लामाबाद, दि. 16 फेब्रुवारी 2024 | अयोध्येतील राम मंदिरात रामलल्ला विराजमान झाले आहेत. प्राणप्रतिष्ठा समारंभानंतर जगभरातून भाविक रामलल्लाच्या दर्शनासाठी येत आहेत. अयोध्येतील मंदिर पाहून आणि भगवान श्रीराम यांचे दर्शन घेऊन अनेक जण भावूक होत आहे. शेकडो वर्षांच्या प्रतिक्षेनंतर रामलल्ला आपल्या भवनात विराजमान झाल्याचा आनंद सर्व भाविकांना येत आहे. भारताच्या शेजारी असलेल्या पाकिस्तानमधून भाविक रामलल्लाच्या दर्शनासाठी येऊ लागले आहेत. पाकिस्तानमधून आलेला ब्लॉगर आणि युट्यूबर विनय कपूर यानेही अयोध्येत राम मंदिरात दर्शन घेतले. रामलल्लाच्या दर्शनासाठी पाकिस्तानातून आलेला तो पहिला व्यक्ती ठरला आहे. दर्शन घेतल्यानंतर तो चांगलाच भावूक झाला आहे. त्याने यासंदर्भात एक व्हिडिओ केला आहे. एका दिवसात हा व्हिडिओ लाखो लोकांनी पाहिला आहे.

रिमझिम पावसात दर्शनाला

युट्यूबर आपला व्हिडिओ शेअर करताना विनय कपूर याने म्हटले आहे की, अयोध्यात मंदिरात दर्शन घेणे आणि अयोध्या फिरण्याचा अनुभव अविस्मरणीय राहिला. अयोध्येतील गल्ल्यांमध्ये फिरण्याचे स्वप्न सत्यात उतरले.  अयोध्येत आल्यानंतर मी स्वत:ला नशीबवान समजत आहे. अयोध्येत आपण पायीच फिरलो. अयोध्येतील गल्ल्यांमधून फिरुन ‘माखन मिसरी’ (दहीसाखर) खाऊन रिमझिम पावसात भगवान रामाच्या दर्शनासाठी मंदिरात पोहचलो, असे व्हिडिओत त्याने म्हटले.

हा क्षण आयुष्यभर कधीच विसरणार नाही

मंदिरात प्रवेश होताच विनय कपूर म्हणाला, मी माझ्या भावना शब्दांत व्यक्त करु शकत नाही. मला माझ्या नशिबावर अभिमान वाटत आहे. भगवान राम यांनी त्यांच्या दरबारात मला दर्शनासाठी बोलवले. हा एक अद्भभूत क्षण आहे. हा क्षण आयुष्यभर कधीच विसरता येणार नाही.

अयोध्येतील व्यवस्थेचे विनय कपूर याने कौतूक केले. सुरक्षा व्यवस्थेसंदर्भात समाधान व्यक्त केले. सिमेंट न वापरता राजस्थानी शैलीमध्ये मंदिर केले गेले आहे, त्यामुळे मंदिराची भव्यता अधिक झाली आहे. राम मंदिराच्या दर्शनानंतर विनय कनक भवनात गेला. त्या ठिकाणी भगवान राम आणि सीता राहत होते. त्यानंतर अयोध्येतील लता चौकाचा फेरफटका मारला. सरयू नदीचे दर्शन घेतले. लक्ष्मण घाट आणि लक्ष्मण किल्ला पाहिला. सध्या ज्या पद्धतीने अयोध्येत काम सुरु आहे, ते पाहता येत्या काळात अयोध्याचा विकास वेगाने होईल.

हे ही वाचा

राम मंदिरासाठी धनवर्षा, दानाची मोजणी करताना थकताय 14 कर्मचारी