आक्रोश आणि मातम… मोहरमच्या मिरवणुकीतील ताबूत हायटेंशन वायरच्या संपर्कात; चौघांचा जागीच मृत्यू, 9 जण गंभीर
बोकारो येथे मोहरमच्या मिरवणुकीदरम्यान मोठी दुर्घटना घडली. येथील हायटेंशन वायरच्या संपर्कात आल्याने एकूण 13 गंभीररित्या भाजले, त्यापैकी चार जणांचा दुर्दैवी मृत्यू झाला.
Bokaro Muharram Incident : झारखंडमधील बोकारो (Bokaro) येथे मोहरमच्या (Muharram) मिरवणुकीत मोठी दुर्घटना घडली. येथे हायटेंशन वायरच्या संपर्कात आल्याने एकूण 13 गंभीररित्या भाजले असून त्यापैकी चौघांचा मृत्यू झाला. उर्वरित 9 जणांची प्रकृती चिंताजनक असल्याचे समजते. मिळालेल्या माहितीनुसार, सकाळी ६ च्या सुमारास बोकारोच्या बर्मो भागातील शेतात ही दुर्घटना घडली. मोहरममध्ये सर्वजण ताजिया घेऊन जात असताना 11000 व्होल्टच्या वायरच्या कचाट्यात अडकले.
घटनास्थळी उपस्थित असलेल्या नागरिकांनी दिलेल्या माहितीनुसार, ताजिया उचलत असताना वरून जाणारी 11,000 ची हायटेंशन लाईन ताजियामध्ये अडकली, त्यामुळे ताजियाच्या मिरवणुकीत ठेवलेल्या बॅटरीचा स्फोट झाला. यामुळे अनेक लोक गंभीररित्या होरपळले. स्थानिक लोकांच्या मदतीने जखमींना तातडीने डीव्हीसी बोकारो थर्मल हॉस्पिटलमध्ये उपचारांसाठी दाखल करण्यात आले.
यामध्ये गंभीररित्या जखमी झालेल्या चौघांचा मृत्यू झाला असून इतर नऊ जखमींची प्रकृती अद्याप चिंताजनक आहे. तसेच यावेळी रुग्णालयात रूग्णवाहिका नसल्याने आणि रूग्णालयातील एकंदर गलथान कारभारामुळे लोकांनी एकच गोंधळ घातला.
