Congress : काँग्रेसमध्ये नाराजीचा सूर? प्रदेशाध्यक्षांच्या बैठकीला 6 खासदारांची दांडी, राजकीय वर्तुळात चर्चांना उधाण

काँग्रेसच्या गोटातून सर्वात मोठी बातमी हाती आली आहे. महाराष्ट्रातील काँग्रेसच्या खासदारांमध्ये नाराजी सूर उमटल्याचं समोर आलं आहे. महाराष्ट्र काँग्रेसचे प्रदेशाध्यक्ष हर्षवर्धन सपकाळ यांच्या बैठकीला 6 खासदारांनी दांडी मारल्याने नाराजीचा सूर असल्याचे समोर आलं आहे. या बैठकीत खासदारांनी प्रणिती शिंदेंवर नाराजी व्यक्त केल्याचंही समोर आलं आहे, अशी माहिती विश्वसनीय सूत्रांनी दिली आहे. काँग्रेसमधील नाराजीच्या चर्चांना उधाण आलं आहे.

मिळालेल्या माहितीनुसार, काँग्रेसचे प्रदेशाध्यक्ष हर्षवर्धन सपकाळ यांच्या बैठकीला 6 खासदारांनी दांडी मारली. दिल्लीत झालेल्या बैठकीत 16 पैकी 10 खासदारांची उपस्थिती होती. काही खासदारांनी प्रणिती शिंदे यांच्याबाबत नाराजी व्यक्त केल्याची माहिती सूत्रांनी दिली आहे. दिल्लीत महाराष्ट्रातील खासदारांची जबाबदारी प्रणिती शिंदेंवर दिल्याने नाराजीचा सूर उमटल्याचे बोलले जात आहे. खासदारांपर्यंत सूचना आणि माहिती पोहोचत नसल्याची तक्रार असल्याची माहिती सूत्रांनी दिली आहे.

बैठकीत नेमकं काय घडलं?

हर्षवर्धन सपकाळांच्या बैठकीला 16 पैकी 10 खासदार उपस्थित होते. तर 6 खासदारांनी दांडी मारली होती. या बैठकीत अजेंडा सांगितला गेला. कामकाज कसं चालतं आणि मतदारसंघातील मुद्दे, यावर ही चर्चा झाली. या बैठकीत प्रणिती शिंदे यांच्याविरोधात तक्रारीचा पाढा मांडल्याचे समोर आलं आहे. खासदारांनी जिल्हाध्यक्षांच्या नियुक्तांवरून गंभीर प्रश्न उपस्थित केले. महाराष्ट्रातील खासदारांच्या समन्वयाची जबाबादारी प्रणिती शिंदे यांच्याकडे देण्यात आली आहे. मात्र, त्यांच्याकडून समन्वय साधला जात नाही, अशी नाराजी खासदारांनी व्यक्त केली. पक्षातील मुद्दे , सूचनांची माहिती मिळत नसल्याची तक्रार खासदारांनी प्रदेशाध्यक्षांकडे मांडली. त्यानंतर यावर लवकरात लवकर तोडगा काढूयात, अशी माहिती विश्वसनीय सूत्रांनी दिली आहे.

शरद पवारांच्या बैठकीला खासदार सुरेश म्हात्रे यांची दांडी

राष्ट्रवादीच्या खासदारांची दिल्लीतील शरद पवार यांच्या निवासस्थानी बैठक आयोजित करण्यात आली होती. पंतप्रधान नरेंद्र मोदी यांची राष्ट्रवादी काँग्रेसच्या खासदारांनी भेट घेतल्यानंतर होत असलेल्या बैठकीला वेगळं महत्त्व प्राप्त झालं होतं. रेवती सुळे यांच्या लग्नाच्या रिस्पेशनला स्वतः पंतप्रधान नरेंद्र मोदी, केंद्रीय गृहमंत्री अमित शहा यांच्यासह भाजपचे बडे नेते हे शरद पवार यांच्या ६ जनपथ निवासस्थानी उपस्थित होते. या बैठकीला लोकसभेतील ७ खासदार उपस्थित आहेत.