इराणकडून आता हादरवणारी धमकी, जगभरात मोठी खळबळ, अमेरिकेच्या अडचणी वाढल्या

अमेरिका, इस्त्रायल आणि इराणमध्ये गेल्या चार आठवड्यापासून युद्ध सुरू आहे. या युद्धामध्ये इराणचं प्रचंड नुकसान झालं आहे. इराण पूर्णपणे उद्ध्वस्त झालं आहे. तर दुसरीकडे इराणच्या मिसाईल हल्ल्यांमुळे इस्त्रायलला घाम फुटला आहे. इराण या युद्धामध्ये केवळ इस्त्रायल आणि अमेरिकेलाच लक्ष्य करत नाहीये, तर ज्या -ज्या आखाती देशांमध्ये अमेरिकेची सैन्य तळं आहेत, त्या देशांना देखील इराणकडून टार्गेट केलं जात आहे. अशा देशांवर देखील इराणकडून मिसाईल हल्ले सुरू आहेत. दरम्यान आता एक मोठी बातमी समोर आली आहे, ती म्हणजे इराणने ज्या -ज्या आखाती देशांमध्ये अमेरिकेची सैन्य तळं आहेत, अशा सर्व देशांना स्पष्ट शब्दात संदेश जारी केला आहे, यामुळे मोठी खळबळ उडाली आहे.

इराणचे राष्ट्रपती मसूद पेजेश्कियान यांनी म्हटलं आहे की, ज्या -ज्या देशांमध्ये अमेरिकेची सैन्य तळं आहेत, अशा सर्वच देशांना आम्ही लक्ष्य करणार आहोत. साऊदी अरेबिया, कुवेत, कतार, युएई या सारख्या देशांना जर आमच्या हल्ल्यांपासून वाचायचं असेल तर त्यांनी अमेरिकेच्या सैनिकांना आपल्या देशातून बाहेर काढावं. दरम्यान इराणच्या या इशाऱ्यापूर्वी इराणकडून सुरू असलेल्या हल्ल्यांविरोधात आखाती देशांनी नाराजी व्यक्त केली होती, तसेच जर हल्ले सुरू राहिले तर प्रत्युत्तर म्हणून आम्ही देखील हल्ले करू अशी धमकी दिली होती, त्यानंतर आता इराणकडून सर्व आखाती देशांना इशारा देण्यात आला आहे. या सर्व पार्श्वभूमीवर इराणाचा इशारा महत्त्वाचा मानला जात आहे.

मसूद पेजेश्कियान यांनी यासंदर्भात आपल्या ट्विटर अकाउंटवर एक पोस्ट केली आहे. ज्यामध्ये त्यांनी म्हटलं आहे की, आम्ही वारंवार हेच सांगत आलो आहोत, की आमच्याकडून पहिला हल्ला होणार नाही. परंतु जर तुम्ही आमच्या आर्थिक केंद्रांना निशाणा बनवण्याचा प्रयत्न केला तर त्याचं प्रत्युत्तर दिलं जाईल. आखाती देशांना आमच्या हल्ल्यांपासून वाचायचं असेल तर त्यांनी अमेरिकेच्या सैन्यांना देशातून बाहेर काढावं.