शरद पवारांनी मराठा आरक्षणाच्या प्रश्नात लक्ष घालावे अन्यथा उद्रेक होईल; उदयनराजे भोसलेंचा इशारा

मुंबई: महाविकासआघाडीच सरकारचे सर्वेसर्वा असलेल्या शरद पवार (Sharad Pawar) यांनी मराठा आरक्षणाचा प्रश्न सोडवण्यासाठी लक्ष घातले पाहिजे. अन्यथा राज्यात मोठा उद्रेक होईल. यापूर्वी मराठा समाजाने आरक्षणासाठी शांततेत मोर्चे काढले होते. मात्र, आता काय होईल हे सांगता येत नाही, असा गंभीर इशारा भाजप खासदार उदयनराजे भोसले यांनी दिला. (BJP MP Udayanraje Bhosale meets Sharad Pawar for Maratha Reservation issue)

मराठा आरक्षणाच्या प्रश्नासंदर्भात उदयनराजे भोसले यांनी गुरुवारी दिल्लीतील शरद पवार यांच्या निवासस्थानी जाऊन त्यांची भेट घेतली. यानंतर त्यांनी प्रसारमाध्यमांशी संवाद साधला. सर्वोच्च न्यायालयातील मराठा आरक्षणाच्या खटल्यात राज्य सरकारचे वकील व्यवस्थितपणे बाजू मांडताना दिसत नाहीत. त्यामुळे आता शरद पवार यांनी या सगळ्यात वैयक्तिकरित्या लक्ष घालून राज्य सरकारला सूचना दिल्या पाहिजेत. महाविकासआघाडी ही शरद पवार यांच्यामुळेच सत्तेत आहे. या सगळ्याची बांधणी त्यांनीच केली. त्यामुळे राज्य सरकारला सांगून मराठा आरक्षणावर तोडगा काढणे, हेदेखील शरद पवार यांचेच काम आहे, असे उदयनराजे भोसले यांनी म्हटले.

शरद पवारांची भेट घेतली, मोदींची भेट घेणार का?

यावेळी प्रसारमाध्यमांनी उदयनराजे भोसले यांना मराठा आरक्षणासाठी पंतप्रधान नरेंद्र मोदी यांची भेट घेणार का, असा प्रश्न विचारला. त्यावर उदयनराजे भोसले यांनी म्हटले की, “हा प्रश्न राजकीय नाही, हा राजकीय मुद्दा नाही. राजकारण कुणी आणू नये. हा विशिष्ट समाजाचा प्रश्न आहे. या समाजासाठी सत्तेत जे आहेत महाराष्ट्रात, पाहिलं तर मराठा समाजाचे सर्वाधिक आमदार आहेत. महाराष्ट्र सरकारने सुप्रीम कोर्टात बाजू मांडायला हवी, ती होताना दिसत नाही.

मी पवारसाहेबांना सांगितलं आपल्याकडून काही मार्गदर्शन महाराष्ट्र सरकारला दिलं पाहिजे. राज्यातील सरकार पवारसाहेबांमुळे. त्याची बांधणी पवारसाहेबांनीच केली. त्यामुळे पवारसाहेबांनीच मराठा आरक्षणावर मार्ग काढायला हवा, असे उदयनराजे भोसले यांनी सांगितले.

‘श्वेतपत्रिका काढा, लोकप्रतिनिधी मराठा आरक्षणासाठी काय करतायंत हे समजू द्या’

गायकवाड आयोगाच्या अहवालाने सखोल अभ्यास करुन मराठा समाज हा सामाजिक आणि आर्थिकदृष्ट्या दुर्बल असल्याचा निष्कर्ष काढला होता. राज्यात मराठा आरक्षणाचा कायदा झाला. त्यानंतर सर्वोच्च न्यायालयातही हे आरक्षण टिकले. मात्र, आता सर्वोच्च न्यायालयात राज्य सरकार मराठा आरक्षणाची बाजू मांडण्यात कमी पडताना दिसत आहे.

राज्य सरकारने मराठा आरक्षणाच्या प्रश्नावरुन दिशाभूल करु नये. मराठा समाजाला आरक्षण द्यायचं नसेल तर तसे सांगावे. अन्यथा एक श्वेतपत्रिका काढावी. जेणेकरून मराठा आरक्षणासाठी लोकप्रतिनिधी काय करतात, हे जनतेला समजेल, असे उदयनराजे भोसले यांनी म्हटले.

(BJP MP Udayanraje Bhosale meets Sharad Pawar for Maratha Reservation issue)