घर आहे की जंगल? 4 भिंतीत 30 सापांच्या पिल्लांचा सुळसुळाट; कुटुंबीय दहशतीत

तुम्ही जंगलात, डोंगराळ भागात गेल्यावर तुम्हाला नाग, सापाचं दर्शन होण्याची शक्यता अधिक असते. अनेक जण सापाच्या भितीने जंगलात फेरफटाका मारायलाही घाबरतात. डोंगराळ भागात अनेक जण जमिनीवर पाहून चालत असतात. मानवी वस्तीत साप क्वचितपणे दिसून येतो. खरंतर जीवघेण्या विषारी सापांची सर्वसामान्यांना खूपच भीती वाटत असते. साधा रस्त्यावर एक साप दिसला तरी नागरिकांची एकच धावाधाव होते. परंतु एका घरात चक्क 30 साप आढळून आल्याची घटना समोर आली आहे.

उत्तर प्रदेशच्या (Uttar Pradesh) सिद्धार्थनगर जिल्ह्यातील बर्डपूर ब्लॉक भागातील करीमपूर महापाली गावात मंगळवारी रात्री अजय गुप्ता यांच्या घरात एका पाठोपाठ एक साप आढळू लागल्याने घरात एकच खळबळ उडाली आहे. या घरात एक नव्हे तर 30 साप आढळून आले. त्यानंतर घरातील सर्वांची एकच धावाधाव झाली. साप आढळून आल्यानंतर कुटुंबातील एका सदस्याने सकाळी सर्पमित्राला बोलावून आणले. त्यानंतर सर्पमित्राने घरातील कानाकोपऱ्यात लपून बसलेल्या सापांच्या तीस पिल्लांना पकडलं. घरातील कोपऱ्यात असलेली अंडी फुटून सापांची पिल्ले बाहेर आल्याचे सांगण्यात येत आहे. या सर्पमित्राने एका प्लास्टिकच्या डब्यात सर्व सापांना बंदिस्त केलं. त्यानंतर जंगलात नेऊन सोडून दिलं.

त्यादिवशी काय घडलं?

घरातील एक सदस्य झाडू मारत होता. त्यावेळी सापाचं पिल्लू घरात आढळलं. त्यानंतर झाडूच्या आधारे सापाचं पिल्लू बाहेर फेकलं. त्यानंतर घरात एका पाठोपाठ सापांची पिल्ले आढळून येऊ लागली. त्यामुळे घर मालक अजय गुप्ताने कुटुंबतील सदस्यांना घरात जाऊ दिले नाही. घरात दुसऱ्या दिवशी सकाळी मोठ्या संख्येने लोक जमले. त्यावेळी एका सर्पमित्राला बोलावण्यात आलं. त्यानंतर सर्पमित्राने घरात बारकाईने सापांची 30 पिल्ले शोधून काढली. त्यानंतर या सर्पमित्राने सर्व सापांच्या पिल्लांना सुरक्षितरित्या प्लास्टिक डब्यातून जंगलात सोडून दिले. सापांची पिल्ले घरात नेमकी कशी पोहोचली, याची माहिती हाती आलेली नाही. परंतु थेट घरात सापांची पिल्ले आढळू लागल्याने गावकऱ्यांचं टेन्शन वाढलं आहे.